సనంద్‌లో సెమీకండక్టర్ ప్లాంట్ కార్మికులతో ప్రధాని మోడీ భేటీ – ఐటీఐ నుంచి మలేషియా శిక్షణ వరకు ప్రేరణాత్మక ప్రయాణం

ప్రధాని నరేంద్ర మోడీ గుజరాత్‌లోని సనంద్ వద్ద ఉన్న సీజీ సెమీ సెమీకండక్టర్ ప్లాంట్‌ను సందర్శించారు. ఈ ప్లాంటులో వివిధ రాష్ట్రాల నుంచి వచ్చి పనిచేస్తున్న యువ ఆపరేటర్లతో ఆయన సంభాషించారు. ఈ కార్మికులు చాలా వరకు ఐటీఐ చదువులు పూర్తి చేసి, తొలిసారి తమ గ్రామాల నుంచి బయటకు వచ్చి ఉద్యోగం చేస్తున్నారు. ప్రధానితో మాట్లాడిన యువతీ యువకులు జార్ఖండ్, బీహార్, జమ్మూ కాశ్మీర్, మధ్యప్రదేశ్ వంటి రాష్ట్రాలకు చెందినవారు. చాలా మంది తమ కుటుంబాల్లో తొలి తరం పారిశ్రామిక ఉద్యోగస్తులు. ఇందులో మహిళలు కూడా ఉన్నారు – పూనమ్ కుమారి, ప్రియాంక ధన్వార్ల వంటి బాలికలు తమ గ్రామాల్లో మొదటిసారిగా వేరే రాష్ట్రంలో ఉద్యోగం చేస్తున్న తొలి అమ్మాయిలు. ఈ కార్మికులు కంపెనీ తరఫున మలేషియాలో ఒక నెల రోజుల పాటు సెమీకండక్టర్ తయారీ ప్రక్రియ, క్లీనింగ్ విధానాలు నేర్చుకోవడానికి శిక్షణ పొందారు. అక్కడ భాషా సమస్య ఉన్నా, ముందుగా వెళ్లిన సీనియర్ ఇంజినీర్లు తమకు బాగా సాయం చేశారని వారు చెప్పారు. శిక్షణ అనంతరం వారంతా తిరిగి భారతదేశానికి వచ్చి ఇప్పుడు ఆపరేటర్లుగా విధులు నిర్వహిస్తున్నారు. ప్రధాని మోడీ ఈ సందర్భంగా యువ కార్మికుల అనుభవాలు అడిగి తెలుసుకున్నారు. తమ గ్రామాల్లో ప్రజల స్పందన, స్నేహితుల ఆసక్తి గురించి వారు వివరించారు. కొందరు అమ్మాయిలు తమ స్నేహితులకు కూడా ఇక్కడ అవకాశాల గురించి చెప్పడంతో, ఇప్పటికే ఇద్దరు అమ్మాయిలు కంపెనీలో చేరినట్లు తెలిపారు. మోడీ వారిని అభినందిస్తూ, ‘గుజరాత్ వంటి భూమి, 100 ఏళ్లకు పైబడిన పురాతన కంపెనీలో పని చేసే అవకాశం లభించింది’ అని ప్రోత్సహించారు. భారత్ సెమీకండక్టర్ రంగంలో దూసుకుపోతున్న తరుణంలో గ్రామీణ నేపథ్యం నుంచి వచ్చిన యువత హై-టెక్ ఉద్యోగాలు చేయడం ప్రేరణాత్మకంగా నిలిచింది. ప్రధాని పర్యటన భారత సెమీకండక్టర్ మిషన్‌కు మరింత ఊతం ఇచ్చింది.