40 ఏళ్ల తర్వాత భారత ప్రధాని న్యూజిలాండ్ పర్యటన; స్వేచ్ఛా వాణిజ్య ఒప్పందం అమలుపై చర్చలు

ప్రధాని నరేంద్ర మోదీ న్యూజిలాండ్ పర్యటనకు చేరుకున్నారు. నాలుగు దశాబ్దాల తర్వాత ఓ భారత ప్రధాని న్యూజిలాండ్‌లో అడుగుపెట్టడం ఇదే మొదటిసారి. ఆక్లాండ్‌లో ఆయనకు ఘన స్వాగతం లభించింది. ఇండోనేషియా, ఆస్ట్రేలియా దేశాల పర్యటన ముగించుకుని ఆయన ఇక్కడికి వచ్చారు.

ఈ పర్యటనలో ప్రధాన అంశం ఇటీవల సంతకం చేసిన భారత-న్యూజిలాండ్ స్వేచ్ఛా వాణిజ్య ఒప్పందం (FTA). దీని అమలు పురోగతిని సమీక్షించి, ఆర్థిక సంబంధాల తదుపరి దశను నిర్దేశించడంపై చర్చించనున్నారు. న్యూజిలాండ్ ప్రధాని క్రిస్టోఫర్ లక్సన్‌తో మోదీ సమావేశం కానున్నారు. ఈ భేటీలో పెట్టుబడులు, విద్య, సాంకేతికత, సముద్ర భద్రత, ఇండో-పసిఫిక్ సహకారం వంటి అంశాలు చర్చకు రానున్నాయి. భారత ఎగుమతుల అవకాశాలు కూడా ప్రాధాన్యత సంతరించుకున్నాయి.

40 ఏళ్ల క్రితం న్యూజిలాండ్‌లో భారత సంతతి జనాభా 20 వేలు ఉండగా, ఇప్పుడు అది 4 లక్షలకు పెరిగింది. భారత సమాజం స్థానికంగా వ్యాపార, సాంస్కృతిక రంగాల్లో కీలకంగా మారింది. ప్రధాని రాకపై అక్కడి భారతీయులు ఎంతో ఉత్సాహంగా ఉన్నారు.

ఇక క్రీడా దౌత్యం కూడా ఈ పర్యటనలో ప్రాధాన్యత సంతరించుకుంది. భారత్-న్యూజిలాండ్ మధ్య తొలి క్రీడా మ్యాచ్ 1926లో జరగ్గా, ఈ సందర్భంగా ఆ రెండు దేశాల మధ్య క్రీడా సంబంధాల శతాబ్ది ఉత్సవం నేపథ్యంలో స్పోర్ట్స్ డిప్లొమసీపై దృష్టి సారించారు. న్యూజిలాండ్ చిన్న దేశమైనా హై-పెర్ఫామెన్స్ స్పోర్ట్స్‌లో అగ్రగామి కావడంతో, రెండు దేశాల మధ్య పరస్పర అనుభవాల మార్పిడికి అవకాశం ఉంది.

ఆర్థిక భాగస్వామ్యంలో వ్యవసాయ సాంకేతికత, ఉద్యానవన పంటలు, విద్యారంగంలో సహకారం ప్రధానంగా ఉంటాయని అంచనా. న్యూజిలాండ్ అధునాతన వ్యవసాయ టెక్నాలజీని భారత రైతులకు అందించే విషయంలో చర్చలు జరుగుతాయని భావిస్తున్నారు.