40 ఏళ్ల తర్వాత న్యూజిలాండ్ వెళ్తున్న ప్రధాని మోదీ: షెడ్యూల్‌లో ప్రత్యేకతలివే

భారత ప్రధాని నరేంద్ర మోదీ 40 సంవత్సరాల తర్వాత న్యూజిలాండ్‌లో పర్యటించనున్నారు. చివరిసారిగా 1985లో అప్పటి ప్రధాని రాజీవ్ గాంధీ న్యూజిలాండ్ సందర్శించారు. ప్రస్తుతం న్యూజిలాండ్‌లోని భారత హైకమిషన్ అధికారి ఈ వివరాలు వెల్లడించారు. ఇరు దేశాల మధ్య స్నేహపూర్వక సంబంధాలు, ప్రజాస్వామ్య విలువలు, స్వేచ్ఛాయుత ఇండో-పసిఫిక్ ప్రాంతంపై ఉమ్మడి దృక్పథం ఈ పర్యటనకు బలమైన పునాదిగా నిలిచాయి.

ఈ నెల 11వ తేదీన ప్రధాని మోదీకి న్యూజిలాండ్ ప్రభుత్వం ఘన స్వాగతం పలుకనుంది. ఇటీవలే ఏప్రిల్‌లో రెండు దేశాలు స్వేచ్ఛా వాణిజ్య ఒప్పందం (FTA)పై సంతకాలు చేశాయి. ఈ ఒప్పందం నేపథ్యంలో వాణిజ్యం, సముద్ర సహకారం, పర్యాటకం, సాంస్కృతిక మార్పిడి, ఉగ్రవాద నిరోధం వంటి అంశాలపై చర్చలు జరగనున్నాయి. అదే రోజున భారీ వ్యాపార ప్రతినిధి బృందం న్యూజిలాండ్ ప్రముఖ సీఈఓలతో సమావేశమవుతుంది. క్రీడా రంగంలో కూడా ఓ ప్రత్యేక కార్యక్రమం ఉంటుంది.

1926లో తొలిసారిగా భారత ఆర్మీ హాకీ జట్టు న్యూజిలాండ్‌లో పర్యటించింది. ఆ ఘట్టానికి 100 ఏళ్లు పూర్తయిన సందర్భంగా ఇరు దేశాల క్రీడా సంబంధాలు సెలబ్రేట్ చేసుకుంటున్నాయి. అదే రోజు సాయంత్రం ‘కియోరా మోదీ’ పేరుతో భారీ ప్రవాస భారతీయుల సమావేశం జరుగనుంది. ఈ కార్యక్రమంలో ప్రధాని మోదీ డయాస్పోరాను ఉద్దేశించి ప్రసంగిస్తారు.

భారత్-న్యూజిలాండ్ మధ్య వాణిజ్యాన్ని మరింత పెంచడంతోపాటు ఇండో-పసిఫిక్‌లో వ్యూహాత్మక భాగస్వామ్యాన్ని బలోపేతం చేయడం ఈ పర్యటన లక్ష్యం. చివరి భారత ప్రధాని పర్యటన జరిగి 40 ఏళ్లు కావడంతో ఈ సందర్శన చారిత్రకంగా మారనుందని హైకమిషన్ అధికారి పేర్కొన్నారు.