హైదరాబాద్ మెట్రోలో డిజిటల్ టికెటింగ్ వ్యవస్థతో ప్రయాణికులకు ఇబ్బందులు

హైదరాబాద్ మెట్రో రైల్ స్టేషన్లలో టికెట్ కౌంటర్లను మూసివేసి పూర్తిగా డిజిటల్ చెల్లింపు విధానాన్ని అమలు చేయడంతో ప్రయాణికులు తీవ్ర ఇబ్బందులు ఎదుర్కొంటున్నారు. హైదరాబాద్ లో 69 కిలోమీటర్ల మేర మెట్రో రైల్ సేవలు నిరంతరం కొనసాగుతున్నాయి. ప్రతిరోజు దాదాపు 5 లక్షల మంది ప్రయాణికులు మెట్రోలో ప్రయాణిస్తున్నారు.

టికెట్లను కౌంటర్ ద్వారా జారీ చేయడం నిలిపివేసి వెండింగ్ మిషన్లు మరియు డిజిటల్ పేమెంట్ యాప్స్ ద్వారా మాత్రమే టికెట్లు తీసుకోవాలని అధికారులు నిర్ణయించారు. PhonePe వంటి యాప్స్ ద్వారా కూడా టికెట్ బుక్ చేసుకోవచ్చని అధికారులు తెలిపారు. మెట్రో స్మార్ట్ కార్డు కలిగి ఉన్న ప్రయాణికులకు ఎలాంటి ఇబ్బంది లేకపోయినా, స్మార్ట్ ఫోన్ లేని వారికి, వృద్ధులకు మరియు మహిళలకు ఈ కొత్త విధానం పెద్ద సమస్యగా మారింది.

మినిమం టికెట్ 11 రూపాయలు ఉండగా, చిల్లర సమస్య కూడా ప్రయాణికులను వేధిస్తున్నది. వెండింగ్ మిషన్ వినియోగంపై అవగాహన లేని ప్రయాణికులు గందరగోళానికి గురవుతున్నారు. స్టేషన్లలో సహాయం చేసే సిబ్బంది కూడా తగినంత మంది లేకపోవడం వల్ల పరిస్థితి మరింత జటిలంగా మారింది.

ప్రయాణికులు మాట్లాడుతూ, కనీసం ఒక్క టికెట్ కౌంటర్ అయినా నిర్వహించాలని, డిజిటల్ పేమెంట్ పై అవగాహన పెంచేందుకు శిక్షణ ఇవ్వాలని డిమాండ్ చేశారు. సడన్ గా కౌంటర్లు మూసివేయడం వల్ల చదువు తెలియని వారికి, వృద్ధులకు తీవ్ర ఇబ్బంది కలుగుతుందని పేర్కొన్నారు.

క్యాష్ లెస్ లావాదేవీలను మరియు డిజిటల్ చెల్లింపులను ప్రోత్సహించేందుకే ఈ నిర్ణయం తీసుకున్నామని అధికారులు వివరించారు. వెండింగ్ మిషన్లు ప్రయాణికుల రద్దీని నియంత్రించడంలో కూడా సహాయపడతాయని తెలిపారు. అయితే అన్ని వర్గాల ప్రయాణికులకు అనుకూలంగా ఉండేలా కొన్ని స్టేషన్లలో అయినా టికెట్ కౌంటర్లు కొనసాగించాలని ప్రజలు గట్టిగా డిమాండ్ చేస్తున్నారు.