అంతరిక్ష రంగంలో ప్రపంచ ప్రతిభకు మ్యాగ్నెట్‌గా భారత్: ప్రధాని మోదీ

భారత్ అంతరిక్ష రంగంలో ప్రపంచ ప్రతిభను ఆకర్షించే గ్లోబల్ మ్యాగ్నెట్‌గా మారగలదని ప్రధాని నరేంద్ర మోదీ అన్నారు. విదేశాలకు వెళ్లిన నిపుణులు తిరిగి వస్తున్న నేపథ్యంలో, ఈ రంగంలో జీవితం నిర్మించుకోవాలనుకునే వారంతా భారత్ వైపు చూసేలా వాతావరణం సృష్టించాలని ఆయన సూచించారు. భారత స్టార్టప్‌లతో గానీ, స్పేస్ ఏజెన్సీలతో గానీ అనుసంధానం అయ్యేలా ప్రోత్సహించాలని చెప్పారు.

ప్రపంచవ్యాప్తంగా ఉన్న టాలెంట్‌ను ఒక అయస్కాంతంలా భారత్ ఆకర్షించగలదని, ఇది దేశానికి పెద్ద బలంగా మారుతుందని ప్రధాని అభిప్రాయపడ్డారు. ఉపగ్రహాలను అంతరిక్షంలో ఒక ప్రదేశం నుంచి మరో ప్రదేశానికి తరలించే ఇంజన్లను భారత కంపెనీలు తయారు చేస్తున్నాయని, వీటికి ప్రపంచవ్యాప్తంగా మంచి ఆదరణ లభించిందని ఆయన తెలిపారు. ఇలాంటి ఇంజన్లు ఉపగ్రహాలను 5 నుంచి 15 ఏళ్ల వరకు అంతరిక్షంలో నడిపించగలవని వివరించారు.

భారత అంతరిక్ష రంగ కంపెనీలు ఎగుమతులకు సిద్ధంగా ఉన్నాయని, ప్రభుత్వ మద్దతు కూడా ఉందని ప్రధాని అన్నారు. ధరలో భారత్ చాలా పోటీగా ఉందని, ప్రతిభ విషయంలో ఎలాంటి సందేహం లేదని చెప్పారు. దేశ ప్రజల్లో రిస్క్ తీసుకునే సామర్థ్యం ఎక్కువగా ఉండడం వల్ల అంతరిక్ష రంగంలో వేగంగా స్థానం సంపాదించవచ్చని ఆయన స్పష్టం చేశారు. వచ్చే 18 నెలల్లో గ్లోబల్ గ్రౌండ్ స్టేషన్ నెట్‌వర్క్ ఏర్పాటు చేయాలనే లక్ష్యాన్ని ప్రభుత్వం పెట్టుకుంది.