బాపట్ల జిల్లాలో పోలీసుల కార్డన్ సెర్చ్; 32 ద్విచక్ర వాహనాలు, 8 ఆటోలు సీజ్

బాపట్ల జిల్లా చీరాలలోని బండపాలెంలో పోలీసులు కార్డన్ సెర్చ్ నిర్వహించారు. ఈ తనిఖీలో సరైన ధ్రువపత్రాలు లేని 32 ద్విచక్ర వాహనాలను, 8 లగేజ్ ఆటోలను స్వాధీనం చేసుకున్నారు. వాటిని పోలీస్ స్టేషన్‌కు తరలించారు.

ప్రతి ఆదివారం ఏదో ఒక ప్రాంతంలో ప్రత్యేక తనిఖీలు చేస్తామని పోలీసులు తెలిపారు. గంజాయి, ఇతర మాదక ద్రవ్యాలపై దృష్టి పెట్టామన్నారు. సబ్ డివిజన్ పరిధిలో సుమారు 40 మంది సిబ్బంది ఈ తనిఖీలో పాల్గొన్నారు.

వాహనాల ధ్రువపత్రాలు, దొంగిలించిన వాహనాలు ఉన్నాయా అనే అంశాలను సిబ్బంది తనిఖీ చేశారు. గంజాయి సంబంధిత ఆధారాల కోసం కూడా పరిశీలించారు. ధ్రువపత్రాలు లేని వాహనాలను పోలీస్ స్టేషన్‌కు తరలించి తనిఖీ కొనసాగిస్తున్నారు.

గంజాయి అమ్మినా, కలిగి ఉన్నా కఠిన చర్యలు తప్పవని పోలీసులు హెచ్చరించారు. ప్రజలకు అవగాహన కల్పించారు. గంజాయి వినియోగించేవారు, అమ్మేవారి సమాచారం ఉంటే పోలీసులకు తెలియజేయాలని కోరారు.