హైదరాబాద్ శివార్లలో పోలీసులపై కత్తితో దాడి.. ఆత్మరక్షణలో కాల్పులు

హైదరాబాద్ శివార్లలో సోమవారం రాత్రి పోలీసులు జరిపిన కాల్పుల ఘటన కలకలం సృష్టించింది. ఆస్తి నేరాల కేసులో నిందితుడిగా ఉన్న శ్రీకాంత్ అనే వ్యక్తి పోలీసులపై కత్తితో దాడి చేయడంతో ఆత్మరక్షణలో పోలీసులు కాల్పులు జరిపారు.

పోలీసులు తెలిపిన వివరాల ప్రకారం.. రాత్రి 11.30 గంటల సమయంలో నల్గొండ సీసీఎస్ పోలీసులు వాహన తనిఖీలు చేపట్టారు. ఇబ్రహీంపట్నం నుంచి బెంగళూరు వైపు ఔటర్ రింగ్ రోడ్డుపై వెళ్తున్న డీసీఎం వాహనాన్ని (ఏపీ 39 వీబీ 3640) అనుమానంతో ఆపేందుకు ప్రయత్నించారు. శ్రీకాంత్ వాహనం ఆపకుండా వేగంగా వెళ్లేందుకు ప్రయత్నించగా, పోలీసులు చుట్టుముట్టారు.

వాహనం ఆగగానే శ్రీకాంత్ తన వద్ద ఉన్న కత్తితో పోలీసులపై దాడికి దిగాడు. దీంతో అప్రమత్తమైన పోలీసులు అతనిపై రెండు రౌండ్ల కాల్పులు జరిపారు. కాళ్లకు తగిలిన బుల్లెట్ గాయాలతో శ్రీకాంత్ కిందపడిపోయాడు. అనంతరం గాయపడిన శ్రీకాంత్ ను వనస్థలిపురం ఏరియా ఆసుపత్రికి తరలించి చికిత్స అందిస్తున్నారు.

పోలీసులు తెలిపిన దాని ప్రకారం.. శ్రీకాంత్ గతంలో పలు ఆస్తి నేరాల కేసుల్లో నిందితుడు. ప్రస్తుతం అతనిపై కేసు నమోదు చేసి దర్యాప్తు చేపట్టారు. అతని గత నేర చరిత్రపై విచారణ కొనసాగుతోంది.