కొమరం భీం ఆసిఫాబాద్‌లో మాసాడే సోమయ్య హత్య కేసు ఛేదించిన పోలీసులు

కొమరం భీం ఆసిఫాబాద్ జిల్లాలో రైల్వే స్టేషన్ సమీపంలో జరిగిన మాసాడే సోమయ్య హత్య కేసును పోలీసులు గంటల వ్యవధిలోనే ఛేదించారు. రెబ్బన మండలం తుంగెడి గ్రామానికి చెందిన భోగరావు నగేష్‌ను నిందితుడిగా గుర్తించి అరెస్ట్ చేశారు.

పోలీసులు తెలిపిన వివరాల ప్రకారం, రెండు రోజుల క్రితం సోమయ్య అనే వృద్ధుడు రైల్వే స్టేషన్ దగ్గర టీ స్టాల్‌కు వచ్చాడు. అదే సమయంలో నగేష్ డబ్బుల కోసం సోమయ్యపై గొడ్డలితో దాడి చేశాడు. మెడపై తీవ్ర గాయాలతో సోమయ్య మృతి చెందాడు. హత్య అనంతరం నగేష్ సోమయ్య వద్ద ఉన్న డబ్బులు తీసుకుని పారిపోయాడు.

సంఘటన స్థలంలో సీసీటీవీ ఫుటేజ్ ఆధారంగా పోలీసులు నిందితుడిని గుర్తించారు. డీఎస్పీ, ఎస్పీ ఆదేశాలతో పోలీసు బృందాలు ఏర్పాటు చేసి గాలింపు చేపట్టారు. నగేష్ సిర్పూర్ టౌన్ రైల్వే స్టేషన్లో ఉన్నట్లు సమాచారం అందడంతో పోలీసులు అక్కడికి చేరుకుని అతడిని అదుపులోకి తీసుకున్నారు.

నిందితుడిని అరెస్ట్ చేసిన పోలీసులు, కోర్టులో హాజరుపరచి రిమాండ్‌కు తరలించారు. కేసుపై దర్యాప్తు కొనసాగుతోంది.