భారీ వర్షాల నేపథ్యంలో మంత్రి పొంగులేటి హై అలర్ట్.. అన్ని శాఖల అధికారులకు ఆదేశాలు

తెలంగాణలో భారీ వర్షాలు కురుస్తోన్న నేపథ్యంలో రాష్ట్ర మంత్రి పొంగులేటి శ్రీనివాస్ రెడ్డి అధికారులతో టెలీ కాన్ఫరెన్స్ నిర్వహించారు. వాతావరణ శాఖ హెచ్చరికల దృష్ట్యా అన్ని శాఖల అధికారులు పూర్తి స్థాయిలో అప్రమత్తంగా ఉండాలని ఆదేశించారు.

రెవెన్యూ, పోలీస్, పంచాయతీరాజ్, మున్సిపల్, విద్యుత్, నీటి సరఫరా, వైద్య ఆరోగ్యం వంటి అన్ని శాఖలు సమన్వయంతో పని చేయాలని మంత్రి సూచించారు. వర్ష ప్రభావం ఎక్కువగా ఉండే జిల్లాల్లో పరిస్థితిని ఎప్పటికప్పుడు పర్యవేక్షించాలి.

వాగులు, చెరువులు, జలాశయాల వద్ద భద్రతా చర్యలు తీసుకోవాలని చెప్పారు. లోతట్టు ప్రాంతాల్లో నివసించే ప్రజలను అవసరమైతే పునరావాస కేంద్రాలకు తరలించాలని ఆదేశించారు. హైదరాబాద్‌లో ట్రాఫిక్, విద్యుత్ సరఫరా, తాగునీటి పంపిణీకి అంతరాయం కలగకుండా హైడ్రా, జీహెచ్ఎంసీ, ట్రాఫిక్ పోలీసులు సమన్వయం చేసుకోవాలని వివరించారు.

నాలుగు రోజుల క్రితం వరకు 30 శాతంగా ఉన్న వర్షపాతం లోటు ఇటీవలి వర్షాలతో దాదాపు సాధారణ స్థాయికి చేరిందని మంత్రి తెలిపారు. మరో రెండు రోజుల పాటు భారీ వర్షాలు కురిసే అవకాశం ఉన్నందున అధికారులు అప్రమత్తంగా ఉండాలని మరోసారి సూచించారు.