సింహవాహిని బోనాలకు రూ.40 కోట్ల ప్రత్యేక నిధులు: మంత్రి పొన్నం ప్రభాకర్

లాల్ దర్వాజా సింహవాహిని మహంకాలి అమ్మవారి బోనాల సందర్భంగా మంత్రి పొన్నం ప్రభాకర్ ఏర్పాట్లను వివరించారు. ఆలయంలో జరిగిన ఉత్సవంలో ఆయన మాట్లాడుతూ, భక్తులకు ఎటువంటి అసౌకర్యం కలగకుండా ప్రభుత్వం ప్రత్యేక చర్యలు తీసుకుందని చెప్పారు.

ముఖ్యమంత్రి రేవంత్ రెడ్డి బడ్జెట్‌లో రూ.20 కోట్లు కేటాయించగా, మరో రూ.20 కోట్లు స్పెషల్ డెవలప్మెంట్ ఫండ్ (SDF) నుంచి ఇచ్చినట్లు ఆయన తెలిపారు. ఈ నిధులతో ఆలయ అలంకరణ, భక్తుల సౌకర్యాలు మెరుగు పరిచామన్నారు.

వికలాంగులు, గర్భిణులు, శిశువుల తల్లులు, వృద్ధులు, జోగినీలకు ప్రత్యేక క్యూ లైన్లు ఏర్పాటు చేసినట్లు వెల్లడించారు. భక్తులకు మంచినీటి సౌకర్యం కల్పించడంతో పాటు వాలంటీర్లు సహాయం అందిస్తున్నారని చెప్పారు.

ఆషాఢ మాసంలో ప్రతి ఏటా వచ్చే ఈ బోనాల పండుగకు 100 ఏళ్ల చరిత్ర ఉందని, ప్లేగు, కలరా వ్యాధుల నుంచి కాపాడాలని సైనికులు చేసిన ప్రార్థనల నుంచి ఈ ఆచారం మొదలైందని మంత్రి గుర్తుచేశారు. రైతులకు మంచి వర్షాలు, సమాజం శ్రేయస్సు కోసం భక్తులు మొక్కులు చెల్లిస్తారని వివరించారు.

ఆషాఢ మాసం ముగియడంతో, శ్రావణ మాసం ప్రారంభమయ్యే నేపథ్యంలో రాబోయే ఉత్సవాలకూ ఇదే స్థాయిలో ఏర్పాట్లు చేస్తామని మంత్రి హామీ ఇచ్చారు. భక్తుల సౌకర్యమే ప్రభుత్వ ప్రాధాన్యత అని స్పష్టం చేశారు.