జాతీయ చేనేత దినోత్సవం: హుస్నాబాద్‌లో మొక్కలు నాటిన మంత్రి పొన్నం ప్రభాకర్

సిద్దిపేట జిల్లా హుస్నాబాద్‌లో జాతీయ చేనేత దినోత్సవ వేడుకల్లో మంత్రి పొన్నం ప్రభాకర్ పాల్గొన్నారు. వనమహోత్సవం కార్యక్రమంలో భాగంగా డిగ్రీ కాలేజీ, మోడల్ స్కూల్ గర్ల్స్ హాస్టల్ ప్రాంగణాల్లో ఆయన మొక్కలు నాటారు.

భవిష్యత్తు తరాల కోసం ప్రతి ఒక్కరూ మొక్కలు నాటి సంరక్షించాలని ఆయన అన్నారు. మొక్కలు నాటడం వల్ల వాతావరణం సమతుల్యంగా ఉంటుందని, అతి వర్షాలు, అనావృష్టి వంటి ప్రకృతి వైపరీత్యాలు నివారించవచ్చని మంత్రి వివరించారు. రాష్ట్ర ప్రభుత్వం కోట్లాది మొక్కలు నాటేందుకు చర్యలు చేపట్టిందని తెలిపారు.

చేనేత రంగ ప్రోత్సాహంపై మాట్లాడుతూ, ప్రభుత్వ కార్యక్రమాల్లో చేనేత వస్త్రాలను మాత్రమే వాడాలని అధికారులను ఆయన ఆదేశించారు. దేవాలయాల్లో శాల్వాలు, టీచర్స్ డే సన్మానాలు వంటి సందర్భాల్లో చేనేత వస్తువుల వినియోగంపై ఇప్పటికే జీవోలు ఉన్నాయని, వాటిని పక్కాగా అమలు చేస్తామని హామీ ఇచ్చారు.

అన్ని రాజకీయ పార్టీలు కూడా చేనేత శాల్వాలనే వాడాలని మంత్రి పొన్నం విజ్ఞప్తి చేశారు. సింథటిక్ లేదా ప్లాస్టిక్ వస్తువులకు బదులు చేనేత వాడితే నేత కార్మికులతో పాటు పత్తి రైతులకూ మేలు జరుగుతుందని ఆయన అన్నారు.