జోగినీలకు గుర్తింపు కార్డులు: మంత్రి పొన్నం ప్రభాకర్ ప్రకటన

ఆషాడ మాసం బోనాల సందర్భంగా రాష్ట్ర ప్రభుత్వం అన్ని ఏర్పాట్లు చేసిందని మంత్రి పొన్నం ప్రభాకర్ తెలిపారు. జోగినీల సంక్షేమం కోసం ప్రభుత్వం కట్టుబడి ఉందని, వారు కోరిన గుర్తింపు కార్డులు త్వరలో అందజేస్తామని ఆయన ప్రకటించారు.

ఇప్పటికే జోగినీలను గుర్తించి వారికి ఉపాధి అవకాశాలు కల్పిస్తున్నామని వివరించారు. ఉజ్జయిని మహంకాళి అమ్మవారి ఆశీస్సులతో రాష్ట్రంలో మంచి వర్షాలు కురుస్తాయని ఆశాభావం వ్యక్తం చేశారు.

ఆలయంలో విగ్రహ ప్రతిష్టాపన అంశంపై ఆలయ పెద్దలు, కమిటీ సభ్యులతో సంప్రదించి నిర్ణయం తీసుకుంటామని చెప్పారు. నిన్న జరిగిన కొన్ని సంఘటనల వల్ల కలిగిన ఆవేదనపై బాధితులతో మాట్లాడామని, హైదరాబాద్ బోనాల సమయంలో రెవెన్యూ, ఎండోమెంట్, పోలీస్, దేవాలయాల విభాగాల సమన్వయంతో జోగినీలకు ఎలాంటి ఇబ్బంది లేకుండా చూస్తామని హామీ ఇచ్చారు.