హైదరాబాద్‌లో వర్షాకాల సన్నద్ధత: అధికారులతో మంత్రి పొన్నం ప్రభాకర్ సమీక్ష

హైదరాబాద్‌లో రానున్న వర్షాకాలంలో ప్రజలకు ఇబ్బంది లేకుండా చూడాల్సిన బాధ్యత ప్రభుత్వంపై ఉందని మంత్రి పొన్నం ప్రభాకర్ తెలిపారు. ముఖ్యమంత్రి ఆదేశాల మేరకు మూడు కార్పొరేషన్ల పరిధిలో వర్షాకాల సన్నద్ధతపై అధికారులతో సమీక్ష జరుపుతున్నట్లు ఆయన చెప్పారు.

నగరంలో ఎక్కడా వరద నీరు నిలవకుండా, నీటి నిల్వలు ఏర్పడితే 1-2 గంటల్లో తొలగించేలా ఏర్పాట్లు చేస్తున్నామన్నారు. ప్రజలు డ్రైనేజీల్లో చెత్త వేయకుండా, వర్షపు నీటి సంరక్షణ (rainwater harvesting) చేపట్టాలని మంత్రి కోరారు. రోజుకు 12,000 వాటర్ ట్యాంకర్లు బుక్ చేసుకునే పరిస్థితి నుంచి బయటపడేందుకు వాటర్ హార్వెస్టింగ్ దోహదపడుతుందన్నారు.

ముఖ్యమంత్రి ఇటీవల కమిషనర్లతో సమావేశం నిర్వహించారని, GHMC లో కూడా సమీక్ష జరిగిందని తెలిపారు. వర్షాకాలం ముందు, సమయంలో, తర్వాత మూడు దశల్లో డ్రైనేజీల్లో పూడిక తొలగింపు చేపట్టనున్నట్లు చెప్పారు.

శివారు ప్రాంతాలను మూడు కార్పొరేషన్లలో విలీనం చేసిన నేపథ్యంలో, మల్కాజ్‌గిరి, సైబరాబాద్ కార్పొరేషన్ల పరిధిలో సాంకేతికతను వినియోగించి సమస్యల పర్యవేక్షణ, పరిష్కారం కోసం ప్రత్యేక చర్యలు తీసుకుంటున్నామన్నారు. ఐదు శాఖల అధికారుల సమన్వయంతో శాశ్వత పరిష్కారాల దిశగా కృషి చేస్తున్నట్లు మంత్రి వివరించారు.