గురుగ్రామ్‌లో 11,000 వోల్టుల విద్యుత్ లైన్ తెగిపోవడంతో NH-48 పై ట్రాఫిక్ స్తంభించింది

గురుగ్రామ్‌లోని నరింగుర్ సమీపంలో NH-48 జాతీయ రహదారిపై శనివారం ఉదయం భారీ విద్యుత్ ప్రమాదం చోటు చేసుకుంది. 11,000 వోల్టుల హైటెన్షన్ విద్యుత్ లైన్ ఒక్కసారిగా తెగిపోవడంతో రహదారి పూర్తిగా స్తంభించింది. ఇండియన్ ఆయిల్ పెట్రోల్ పంప్ వద్ద ఈ ఘటన జరిగింది. లైన్ రోడ్డుపై పడటంతో ప్రయాణికులు భయంతో పరుగులు తీశారు. దీంతో నరింగుర్ నుండి కిర్కి దవాతుల్ ప్లాజా వరకు దాదాపు 4 నుంచి 5 కిలోమీటర్ల మేర ట్రాఫిక్‌జామ్ ఏర్పడింది. వాహనాలు గంటల తరబడి నిలిచిపోయాయి.

గురుగ్రామ్ ట్రాఫిక్ పోలీసులు వెంటనే స్పందించారు. ఢిల్లీ-జైపూర్, జైపూర్-ఢిల్లీ క్యారేజ్‌వేలతో పాటు సర్వీస్ రోడ్డుపై కూడా ట్రాఫిక్‌ను తాత్కాలికంగా నిలిపివేశారు. దెబ్బతిన్న లైన్‌ను తొలగించే పనిలో అధికారులు నిమగ్నమయ్యారు. ప్రయాణికులకు ప్రత్యామ్నాయ మార్గాలు ఉపయోగించాలని పోలీసులు సూచించారు. ఈ మార్గంలో ట్రాఫిక్ పునరుద్ధరణకు సమయం పట్టే అవకాశం ఉందని అధికారులు తెలిపారు.