శ్రీరాముడిపై వ్యాఖ్యలు: నటుడు ప్రకాష్ రాజ్పై తిరుపతి కోర్టులో క్రిమినల్ కేసు నమోదుకు పిటిషన్

తిరుపతి కోర్టులో BJP నేత భాను ప్రకాష్ రెడ్డి సినీ నటుడు ప్రకాష్ రాజ్ పై క్రిమినల్ కేసు నమోదు చేయాలని పిటిషన్ దాఖలు చేశారు. శ్రీరాముడిపై ప్రకాష్ రాజ్ చేసిన వ్యాఖ్యలు హిందువుల మనోభావాలను దెబ్బతీసాయని ఈ పిటిషన్ లో ఆరోపించారు. న్యాయవాది అజయ్ కుమార్ ద్వారా ఈ పిటిషన్ సమర్పించారు.

పిటిషన్ అనంతరం భాను ప్రకాష్ రెడ్డి మాట్లాడుతూ, ప్రకాష్ రాజ్ హిందువుల దేవుళ్లపై అనుచిత వ్యాఖ్యలు చేశారని ఆరోపించారు. కోట్లాది మంది హిందువుల మనోభావాలు దెబ్బతిన్నాయని, ప్రకాష్ రాజ్ ను తీవ్రంగా హెచ్చరించారు. "న్యాయపరంగా పోరాటం చేస్తాం. తిరుపతి కోర్టుకు రప్పించి శిక్ష పడేలా చేస్తాం" అని ఆయన చెప్పారు.

ప్రకాష్ రాజ్ హిందువులను అవమానించే వ్యాఖ్యలు చేశారని, ఆయన హిందువే కాదని భాను ప్రకాష్ రెడ్డి వ్యాఖ్యానించారు. చట్టపరంగా పోరాటం చేస్తామని, ప్రకాష్ రాజ్ ను న్యాయస్థానానికి తప్పక రప్పిస్తామని హెచ్చరించారు. ఈ విషయంపై ప్రకాష్ రాజ్ స్పందన లభ్యం కాలేదు.