వరదరాజ పెరుమాళ్ బ్రహ్మోత్సవాల్లో అర్చకుల మధ్య ఘర్షణ; భక్తులు ఆగ్రహం

కాంచీపురంలోని వరదరాజ పెరుమాళ్ ఆలయ బ్రహ్మోత్సవాల్లో నాలుగో రోజు అర్చకుల మధ్య వివాదం ఘర్షణకు దారితీసింది. చంద్రప్రభ వాహనంపై స్వామివారి ఊరేగింపు సమయంలో తైంకలై, వడకలై అర్చకుల మధ్య మాటామాట పెరిగి శారీరకంగా దాడికి దిగారు. భక్తులు వారిని విడదీసే ప్రయత్నం చేశారు.

ఈ రెండు సంప్రదాయాల అర్చకుల మధ్య దశాబ్దాలుగా ఊరేగింపులో ఎవరు ముందు వరుసలో ఉండాలనే విషయంలో విభేదాలు ఉన్నాయి. కోర్టు ఉత్తర్వుల ప్రకారం మాడ వీథుల్లో ఊరేగింపు సమయంలో తైంకలై అర్చకులు ముందు దివ్య ప్రబంధం పాడాలి, వడకలై అర్చకులు వెనుక వేద పారాయణం చేయాలి. అయినప్పటికీ ఈ వాదన కొనసాగింది.

అదే రోజు శేష వాహనంపై స్వామివారి ఉత్సవం సమయంలో విగ్రహాలను మోసుకెళ్తున్న కర్ర విరిగిపోవడంతో కొంతసేపు అంతరాయం ఏర్పడింది. మరోవైపు యాళీ వాహన సేవకు సరైన ఏర్పాట్లు లేకపోవడంతో చివరి నిమిషంలో ఆలయ ప్రాంగణంలోనే నిర్వహించాల్సి వచ్చింది. ఈ పరిణామాలతో వేలాదిగా వచ్చిన భక్తులు నిరాశకు గురయ్యారు. స్వామివారిని దర్శించుకోవడానికి వచ్చిన భక్తులు అర్చకుల ప్రవర్తన, ఏర్పాట్లపై అసహనం వ్యక్తం చేశారు.

మే 28న ప్రారంభమైన ఈ బ్రహ్మోత్సవాలు ప్రపంచ ప్రసిద్ధి చెందినవి. ఈ ఘటనల నేపథ్యంలో భక్తులు ఆగ్రహం వ్యక్తం చేశారు.