మెడికో ప్రియాంక బ్రెయిన్‌డెడ్ స్థితిలో; సోడియం తగ్గితేనే ఆప్నియా టెస్ట్

హైదరాబాద్‌లోని కిమ్స్ ఆసుపత్రిలో చికిత్స పొందుతున్న మెడికో ప్రియాంక ఆరోగ్యం ఆందోళనకరంగా ఉంది. ఆమె బ్రెయిన్‌డెడ్ స్థితిలో ఉన్నట్లు వైద్యులు తల్లిదండ్రులకు తెలిపారు. శరీరానికి, మెదడుకు మధ్య నరాల వ్యవస్థ తెగిపోయినందున మెదడు పనిచేయడం ఆగిపోయింది.

ప్రస్తుతం ప్రియాంకకు వెంటిలేటర్‌పై చికిత్స అందిస్తున్నారు. చివరి ప్రయత్నంగా వైద్యులు ఆప్నియా టెస్ట్ నిర్వహించాలని నిర్ణయించారు. అయితే ఆమె శరీరంలో సోడియం స్థాయిలు ఎక్కువగా ఉండటంతో ఈ పరీక్ష ఆలస్యం అవుతోంది. సోడియం 16% కంటే తక్కువ స్థాయికి చేరితేనే టెస్ట్ చేయగలమని వైద్యులు చెప్పారు. ఆప్నియా టెస్ట్ ద్వారా మెదడు పూర్తిగా స్పందించడం ఆగిపోయిందా లేదా అనేది తేలుతుంది.

ఈ ఘటన నేపథ్యంలో ప్రియాంక తల్లిదండ్రులు ఆమె కోలుకుంటుందనే ఆశతో ఆసుపత్రి వద్ద ఎదురుచూస్తున్నారు. ప్రియాంకకు రాజమండ్రి నుంచి తరలించి హైదరాబాద్ కిమ్స్‌లో చేర్పించారు. ప్రమాదం జరిగిన రోజు నిందితులుగా దశవంత్, జోసెఫ్‌లను పోలీసులు అరెస్ట్ చేసి 14 రోజుల రిమాండ్‌కు తరలించారు. తొలుత బీఎన్ఎస్ 134/125బి సెక్షన్ల కింద కేసు నమోదు చేసిన పోలీసులు, ఆమె పరిస్థితి విషమించడంతో ఉద్దేశపూర్వకంగా ప్రమాదం జరిపినట్లు భావించి బీఎన్ఎస్ 110 సెక్షన్ కింద కేసు మార్పు చేశారు.