ప్రొఫెసర్ జయశంకర్ వర్ధంతి; తెలంగాణ ఉద్యమ సిద్ధాంతకర్త సేవల స్మరణ

ప్రొఫెసర్ కొత్తపల్లి జయశంకర్ తెలంగాణ ఉద్యమంలో ప్రముఖ పాత్ర పోషించారు. 1952 నాటి నాన్-ముల్కీ ఉద్యమం, 1969 తెలంగాణ ఉద్యమం నుంచి మొదలుకొని, 2000-2011 మధ్య కాలంలో ఆయన పోరాటం సాగించారు.

ఆయన వరంగల్ జిల్లాలో జన్మించారు. విద్యార్థి నాయకుడిగా 1954లో ఫజల్ అలీ కమిషన్ ముందు తెలంగాణ, ఆంధ్ర రాష్ట్రాల విలీనాన్ని వ్యతిరేకిస్తూ నివేదిక సమర్పించారు. 1969 ఉద్యమంలో పాల్గొనడంపై అప్పటి ఆంధ్రప్రదేశ్ ముఖ్యమంత్రి బ్రహ్మానంద రెడ్డి ఉద్యోగ బెదిరింపులు చేసినా వెనుకంజ వేయలేదు.

తెలంగాణ రాష్ట్ర సాధన అవసరాన్ని వివరిస్తూ పలు పుస్తకాలు రచించారు. 'తెలంగాణ రాష్ట్రం ఒక డిమాండ్', 'తెలంగాణలో ఏం జరుగుతుంది?', 'వక్రీకరణలు వాస్తవాలు', 'తల్లడిల్లుతున్న తెలంగాణ' వంటి గ్రంథాలు తెలంగాణ ఉద్యమానికి ఊపిరిపోశాయి. క్యాన్సర్ బాధను భరిస్తూనే ప్రపంచవ్యాప్తంగా వేలాది సభల్లో ప్రసంగించి తెలంగాణ ప్రజలను చైతన్యపరిచారు.

తెలంగాణ రాష్ట్ర ఏర్పాటుకు ఆయన అక్షర యుద్ధం, సామాజిక చైతన్యమే మార్గమని నమ్మారు. డిమాండ్ సాధించే వరకు ప్రతి పౌరుడూ పాటుపడాలని సూచించారు. ఆయన మరణం తర్వాత తెలంగాణ రాష్ట్రం ఏర్పడింది.

జయశంకర్ వర్ధంతి నేపథ్యంలో ఆయన సేవలను స్మరించే కార్యక్రమాలు పలు సంస్థలు నిర్వహించాయి. ప్రొఫెసర్ జయశంకర్ చిత్రపటానికి, విగ్రహాలకు నివాళులు అర్పించారు.