పబ్లిక్ పరీక్షల అక్రమాల నిరోధక సవరణ బిల్లు 2026: కఠిన శిక్షలు, ఫాస్ట్ ట్రాక్ కోర్టులు

పబ్లిక్ పరీక్షల్లో అక్రమాలకు పాల్పడే వారిపై కఠిన చర్యలు తీసుకునేందుకు కేంద్ర ప్రభుత్వం సవరణ బిల్లును రేపు లోక్సభలో ప్రవేశపెట్టనుంది. కేంద్ర మంత్రి జితేంద్ర సింగ్ ఈ 'పబ్లిక్ పరీక్షల అక్రమాల నిరోధక సవరణ బిల్లు 2026'ను సభ ముందుకు తీసుకురానున్నారు. ఈ బిల్లుపై రూల్ 377 కింద చర్చ కూడా జరుగుతుంది.

కొత్త సవరణల ప్రకారం, సాధారణ పరీక్ష అక్రమాలకు జైలు శిక్షను 5 ఏళ్ల నుంచి 10 ఏళ్లకు పెంచారు. జరిమానాను రూ.10 లక్షల నుంచి రూ.50 లక్షలకు పెంచారు. పేపర్ లీక్ ముఠాలకు గరిష్టంగా రూ.10 కోట్ల వరకు జరిమానా విధించే అవకాశం ఉంది. పరీక్షలు నిర్వహించే సర్వీస్ ప్రొవైడర్లు నిబంధనలు ఉల్లంఘిస్తే రూ.5 కోట్ల జరిమానా, 8 ఏళ్ల వరకు బ్లాక్ లిస్ట్ చేసే నిబంధన కూడా చేర్చారు.

విచారణ ప్రక్రియను వేగవంతం చేసేందుకు కీలక మార్పులు చేశారు. పరీక్షల కేసుల దర్యాప్తును రెండు నెలల్లో పూర్తి చేయాలి. ప్రత్యేక ఫాస్ట్ ట్రాక్ కోర్టులు ఏర్పాటు చేసి, ఛార్జ్ షీట్ దాఖలైన 3 నెలల్లో తీర్పు ఇచ్చే లక్ష్యంగా పెట్టారు. అప్పీళ్ల పరిష్కారం కోసం హైకోర్టులో ప్రత్యేక బెంచ్ ఏర్పాటు చేసి, 3 నెలల్లో అప్పీళ్లపై నిర్ణయం తప్పనిసరి చేశారు.

ఈ బిల్లు 2024లో అమల్లోకి వచ్చిన 'పబ్లిక్ పరీక్షల అక్రమాల నిరోధక చట్టం'కు సవరణ. ఇటీవల పలు పోటీ పరీక్షల పేపర్ లీకులు, విద్యార్థుల ఆందోళనల నేపథ్యంలో కేంద్రం ఈ మార్పులు తీసుకొస్తోంది. నిన్న కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయగా, ప్రహ్లాద్ జోషికి ఆ శాఖ అదనపు బాధ్యతలు అప్పజెప్పారు. ప్రధాని నరేంద్ర మోదీ ఒక వీడియో సందేశంలో ఇకపై పేపర్ లీకులపై కఠిన చర్యలు తీసుకుంటామని విద్యార్థులకు హామీ ఇచ్చారు.