మంత్రులు దామోదర, పొన్నం, అద్లూరి హైదరాబాద్‌లో పల్స్ పోలియోను ప్రారంభించారు

హైదరాబాద్ బోరబండ యూపీహెచ్‌సీ ఆసుపత్రిలో రాష్ట్ర వైద్యారోగ్య మంత్రి దామోదర రాజనరసింహ, మంత్రి పొన్నం, మంత్రి అద్లూరి లక్ష్మణ్‌లు పల్స్ పోలియో కార్యక్రమాన్ని ప్రారంభించారు. ఈ సందర్భంగా చిన్నారులకు పోలియో చుక్కలు వేశారు.

మంత్రి దామోదర రాజనరసింహ మాట్లాడుతూ, రాష్ట్రంలో పోలియో కేసులు లేకపోయినా ముందస్తు చర్యలు తీసుకుంటున్నామని తెలిపారు. 5 ఏళ్ల లోపు పిల్లలకు పోలియో చుక్కలు వేయడం తప్పనిసరి అన్నారు. రాష్ట్ర ప్రభుత్వం 42 లక్షల మంది పిల్లలకు ఈ చుక్కలను అందించే లక్ష్యంతో 52 లక్షల డోసుల వ్యాక్సిన్లను సిద్ధం చేసింది.

ప్రభుత్వం 22 వేల పోలియో బూత్‌లను ఏర్పాటు చేసింది. రైల్వే స్టేషన్లు, బస్ స్టాండ్‌లు, జంక్షన్లలో 903 మొబైల్ ట్రాన్సిట్ పాయింట్ టీమ్‌లను అందుబాటులో ఉంచింది. 28, 29, 30 తేదీల్లో ఈ క్యాంపులు నిర్వహించనున్నారు.

1995లో మొదలైన ఈ కార్యక్రమం ద్వారా దేశం నుంచి పోలియో నిర్మూలన సాధించారు. తెలంగాణలో గత 14 ఏళ్లుగా పోలియో కేసులు నమోదు కాలేదు. అయినా జాగ్రత్తలు పాటించాలని, తల్లిదండ్రులు పిల్లలను తప్పకుండా బూత్‌లకు తీసుకురావాలని మంత్రి విజ్ఞప్తి చేశారు.