ధర్మేంద్ర ప్రధాన్ రాజీనామా నేపథ్యంలో పంజాబ్‌లో పేపర్ లీక్ వివాదం మరింత తీవ్రం

NEET పేపర్ లీక్ కుంభకోణంపై కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేసిన నేపథ్యంలో, పంజాబ్ రాష్ట్రంలో కూడా పరీక్షల పేపర్ లీక్ ఆరోపణలు రాజ్యకీయంగా దుమారం రేపుతున్నాయి. పంజాబ్ ముఖ్యమంత్రి భగవంత్ మాన్ మాత్రం రాష్ట్రంలో ఒక్క పేపర్ కూడా లీక్ కాలేదని, ఆరోపణలను ఖండిస్తూ, విద్యా వ్యవస్థ మెరుగుపడేందుకు తాను రాజీనామా చేయడానికి కూడా సిద్ధమని అన్నారు. రాష్ట్ర విద్యా మంత్రి హర్జోత్ సింగ్ బైన్స్ ఫార్మసీ పరీక్షలో చీటింగ్ జరిగిందే గానీ, ప్రశ్నాపత్రం లీక్ కాలేదని స్పష్టం చేశారు.

కాగా, ప్రతిపక్ష పార్టీలైన బీజేపీ, కాంగ్రెస్, శిరోమణి అకాలీదళ్ ఆప్ ప్రభుత్వాన్ని తీవ్రంగా టార్గెట్ చేస్తున్నాయి. కేంద్ర మంత్రి రాజీనామా తర్వాత పంజాబ్ లో పేపర్ లీక్ లపై చర్చ ముదిరింది. కాంగ్రెస్ ఆరోపించిన ప్రకారం, గత నాలుగేళ్లలో పంజాబ్‌లో ఆరు పెద్ద పరీక్షల కుంభకోణాలు జరిగాయి. వీటి వల్ల సుమారు 5 లక్షల మంది అభ్యర్థులు ప్రభావితమయ్యారు.

2022 మేలో పంజాబ్ పబ్లిక్ సర్వీస్ కమిషన్ (PPSC) నాయబ్ తహసీల్దార్ నియామక పరీక్ష ఫలితాలు రద్దు చేయాల్సి వచ్చింది. 42,000 మంది అభ్యర్థులను ప్రభావితం చేసిన ఈ కేసులో ఫలితాల తారుమారు ఆరోపణలు వచ్చాయి. 2023 ఫిబ్రవరిలో పంజాబ్ స్కూల్ ఎడ్యుకేషన్ బోర్డు (PSEB) 12వ తరగతి ఇంగ్లిష్ బోర్డు పరీక్ష చివరి నిమిషంలో రద్దయ్యింది; ప్రశ్నాపత్రం లీక్ నేపథ్యంలో 2.5 లక్షల మంది విద్యార్థులు ఇబ్బంది పడ్డారు. అదే ఏడాది మార్చిలో PST సీనియర్ అసిస్టెంట్ నియామక పరీక్షలో ఆన్సర్ కీ లీక్ ఆరోపణలతో లక్ష మంది అభ్యర్థులు ప్రభావితమయ్యారు.

2024 జూన్ లో PPSC అగ్రికల్చర్ డెవలప్‌మెంట్ ఆఫీసర్ పరీక్షకు ముందు ప్రశ్నాపత్రం లీక్ అయినట్లు ఆరోపణలు వచ్చాయి. 2025 డిసెంబరులో PSSB గ్రూప్ B నియామక పరీక్షలో అవకతవకలు జరిగినట్లు కాంగ్రెస్ ఆరోపించింది; ఇందులో లక్ష మంది అభ్యర్థులు ఉన్నారు. ఇటీవల 2026 జులైలో ఫార్మసీ ఆఫీసర్ నియామక పరీక్షల్లో వైర్ లెస్ పరికరాలతో హైటెక్ చీటింగ్ జరిగినట్లు వెలుగులోకి వచ్చింది; 7,000 మంది అభ్యర్థులను ప్రభావితం చేసింది.

ఈ ఆరోపణలపై పంజాబ్ ప్రభుత్వం స్పందిస్తూ, ఎక్కడైనా అవకతవకలు జరిగినట్లు తేలితే చర్యలు తీసుకున్నామని, ప్రస్తుతం ఎటువంటి పేపర్ లీక్ జరగలేదని పేర్కొంది. మరోవైపు, CJP వ్యవస్థాపకుడు అభిజిత్ దే పంజాబ్ పేపర్ లీక్ సమస్యను కూడా పరిష్కరిస్తామని, సంస్థ తదుపరి చర్యలను ప్లాన్ చేస్తున్నామని తెలిపారు.