పూరి జగన్నాథ ఆలయంలో ప్రతిరోజు 15,000 మట్టి కుండల్లో 56 రకాల నైవేద్యాలు

పూరి జగన్నాథ ఆలయంలో ప్రతిరోజు 56 రకాల నైవేద్యాలు తయారుచేస్తారు. ఈ నైవేద్యాలను దాదాపు లక్ష మంది భక్తులకు ప్రసాదంగా పంపిణీ చేస్తారు.

ఆలయంలోని వంటగది ప్రపంచంలోనే అతిపెద్ద బహిరంగ పాకశాలగా పేరుపొందింది. ఇక్కడ ప్రతిరోజు 15 వేల మట్టి కుండలను ఉపయోగిస్తారు. ఒక్కరోజు ఉపయోగించిన కుండలను మరునాడు తిరిగి ఉపయోగించరు. ప్రతి రోజు కొత్త కుండల్లోనే నైవేద్యాలు తయారుచేయడం ఇక్కడి ప్రత్యేక పద్ధతి.

నైవేద్యాల వంటకు మట్టి కుండలను ఒకదానిపై ఒకటి ఏడు వరుసలుగా పేర్చి తాడుతో కట్టి పొయ్యిపై ఉంచుతారు. ఈ విధానంలో వంట చేయడం ఆలయ సంప్రదాయంలో భాగం.

ప్రతిరోజు మధ్యాహ్నం 2 గంటల తర్వాత ఈ నైవేద్యాలను ఆలయంలోని ఆనంద బజార్ ప్రాంగణంలో భక్తులకు అందజేస్తారు. ఈ మహాప్రసాదం ఒక్కరోజు కూడా వృధా కాదని ఆలయ వర్గాలు చెబుతున్నాయి. ఈ విధంగా ప్రతిరోజు లక్ష మందికి పైగా భక్తులకు ప్రసాదం అందుతోంది.