2012లో ఈసీపై విమర్శలపై ప్రధాని మన్మోహన్ సింగ్ భావోద్వేగ ప్రతిస్పందన: మాజీ సీఈసీ కురేషి పుస్తకంలో వెల్లడి

2012లో ఉత్తరప్రదేశ్ ఎన్నికల సమయంలో జరిగిన ఒక సంఘటనను మాజీ ప్రధాన ఎన్నికల కమిషనర్ (సీఈసీ) ఎస్వై కురేషి తన పుస్తకంలో పేర్కొన్నారు. అప్పటి కేంద్ర మంత్రి సల్మాన్ ఖుర్షీద్ ఎన్నికల ప్రవర్తనా నియమావళి అమల్లో ఉన్న సమయంలో ఒక కొత్త పథకాన్ని ప్రకటించారు. దీనిపై బీజేపీ ఎన్నికల సంఘానికి ఫిర్యాదు చేసింది. నియమావళి ఉల్లంఘన జరిగిందని ఈసీ నిర్ధారించింది.

దీనిపై కాంగ్రెస్ పార్టీకి చెందిన కొందరు నేతలు ఎన్నికల సంఘం ఏకపక్షంగా, అహంకారంగా వ్యవహరిస్తోందంటూ విమర్శలు చేశారు. ఈ విమర్శలతో ఈసీ విశ్వసనీయత దెబ్బతింటుందని కురేషి తీవ్ర ఆవేదన వ్యక్తం చేశారు.

ఈ సమయంలో కురేషి నిర్వహించిన ఈద్ వేడుకలకు ప్రధానమంత్రి ప్రెస్ సెక్రటరీ హరీష్ ఖారే హాజరయ్యారు. మంత్రులు బాధ్యతారహితంగా మాట్లాడి రాజ్యాంగ సంస్థల ప్రతిష్ట తగ్గిస్తున్నారని కురేషి ఆయన వద్ద ఆవేదన వ్యక్తం చేశారు. ఈ విషయాన్ని ప్రధానికి చెప్పాలా అని ఖారే అడగడంతో, తప్పకుండా చెప్పాలని కురేషి కోరారు.

మరుసటి రోజు ప్రధానమంత్రి కార్యాలయం నుండి కురేషీకి అత్యవసర కాల్ వచ్చింది. స్వయంగా ప్రధాని మన్మోహన్ సింగ్ మాట్లాడి, వెంటనే కలవాలని కోరారు. అదే రోజు రాత్రి 7 గంటలకు కురేషి ప్రధానమంత్రి నివాసానికి చేరుకున్నారు. అక్కడ మన్మోహన్ సింగ్ తీవ్ర ఆవేదనతో మాట్లాడుతూ, "మీకు నా ఉద్దేశాలపై అనుమానం ఉంటే నేను ఆత్మహత్య చేసుకుంటాను" అని చెప్పడంతో కురేషి స్తబ్దుడయ్యారని పుస్తకంలో రాశారు.

కురేషి వెంటనే స్పందిస్తూ తమ విమర్శ కేవలం కొందరు మంత్రుల ప్రవర్తనపైనే కానీ, ప్రధానిపై కాదని స్పష్టం చేశారు. మన్మోహన్ సింగ్ ఎప్పుడూ ఎన్నికల సంఘాన్ని భారతదేశపు సాఫ్ట్ పవర్‌గా, గర్వకారణంగా భావించేవారని, ఈసీ తన నిబద్ధతను అనుమానిస్తున్నదన్న భావనే ఆయనను తీవ్రంగా కలిచివేసిందని కురేషి ఈ పుస్తకంలో గుర్తు చేసుకున్నారు.