రాధాగాయత్రి కేసులో శ్రీచరణ్ తప్పుడు ప్రకటనలు చేస్తున్నాడని తండ్రి ఆరోపణ

రాధాగాయత్రి మృతి కేసులో శ్రీచరణ్ ప్రజలను, పోలీసులను, మీడియాను తప్పుదారి పట్టిస్తున్నాడని ఆమె తండ్రి సుధాకర్ ఆరోపించారు. తాను మసూరిలో ఉండగా, పోలీసుల అనుమతితో సంబంధిత హోటల్‌ను సంప్రదించానని ఆయన తెలిపారు.

హోటల్ సిబ్బంది తమ ఆవరణలో ఎలాంటి మద్యం లేదా మాదకద్రవ్యాలు సరఫరా చేయడం లేదని, లోపలికి అనుమతించడం లేదని స్పష్టం చేశారని సుధాకర్ వెల్లడించారు. శ్రీచరణ్ మీడియాకు ఇచ్చిన స్టేట్మెంట్లో హోటల్ వాళ్లు ప్రైవేట్‌గా ఏర్పాట్లు చేశారని చెప్పడంతో తాను దిగ్భ్రాంతికి గురైనట్లు ఆయన అన్నారు.

మాజీ సైనికుడిగా తన కూతురి కేసులోనే రక్షణ లేకపోతే, సామాన్యులకు ఎలాంటి రక్షణ ఉంటుందని సుధాకర్ ప్రశ్నించారు. ఈ కేసులో పోలీసులు దర్యాప్తు కొనసాగిస్తున్నారు.