రాయదుర్గం భూమి వివాదం: ఎస్బీఐతో సంబంధాలు పునఃసమీక్షించనున్న తెలంగాణ ప్రభుత్వం

రాయదుర్గం భూమి వేలం వివాదంలో ఎస్బీఐతో తన ఆర్థిక సంబంధాలను పునఃసమీక్షించేందుకు తెలంగాణ ప్రభుత్వం సిద్ధమైంది. ప్రత్యామ్నాయ భూమికి ముందుగా అంగీకరించిన ఎస్బీఐ, తర్వాత వేలాన్ని సవాల్ చేస్తూ హైకోర్టును ఆశ్రయించడం ప్రభుత్వంలో తీవ్ర అసంతృప్తికి దారితీసింది.

జూన్ 1న నిర్వహించిన వేలంలో ఈ భూమిని టిజీఐ సంస్థకు ₹1038.36 కోట్లకు కేటాయించారు. ఎకరానికి సుమారు ₹204 కోట్ల ధర లభించింది. అయితే, తాము ఇచ్చిన ప్రత్యామ్నాయ భూమిని ఎస్బీఐ అంగీకరించి, తర్వాత కోర్టు మెట్లెక్కడాన్ని ప్రభుత్వం తప్పుపడుతోంది. ఎస్బీఐ వైఖరి మార్పు వెనుక రాజకీయ ఒత్తిళ్లు ఉండొచ్చన్న అనుమానం వ్యక్తమవుతోంది.

ఈ నేపథ్యంలో ప్రభుత్వం అన్ని శాఖల బ్యాంకు ఖాతాలను ఎస్బీఐ నుంచి ఇతర బ్యాంకులకు తరలించే ఆలోచన చేస్తోంది. ఎస్బీఐలో ఉన్న ప్రభుత్వ డిపాజిట్లు, ఉద్యోగుల జీతాల ఖాతాలు, పెన్షన్ల చెల్లింపులు, రైతు భరోసా వంటి సంక్షేమ పథకాల నగదు బదిలీలు — ఇలా నెలకు ₹10-12 వేల కోట్ల చెల్లింపులు జరుగుతున్నాయి. సంబంధాలు దెబ్బతింటే చెల్లింపుల వ్యవస్థపై ప్రభావం పడుతుందని ఆర్థిక నిపుణులు హెచ్చరిస్తున్నారు.

ఎస్బీఐ వ్యవహారంపై రిజర్వ్ బ్యాంక్, కేంద్ర ఆర్థిక శాఖ, ప్రధానమంత్రి కార్యాలయానికి ఫిర్యాదు చేయాలని ప్రభుత్వం యోచిస్తున్నట్లు సమాచారం. ప్రస్తుతం వివాదం న్యాయస్థానంలో ఉన్నప్పటికీ, చర్చల ద్వారా సమస్య పరిష్కారం సాధ్యమని అధికారులు భావిస్తున్నారు. కానీ ప్రభుత్వ భూముల హక్కుల విషయంలో రాజీ ఉండదన్న సంకేతాలు ప్రభుత్వం నుంచి వస్తున్నాయి.