వర్షాకాలంలో ఉద్యాన పంటల సంరక్షణపై అదిలాబాద్ కేవీకే శాస్త్రవేత్త సూచనలు

అదిలాబాద్ జిల్లాలో ఇటీవల కురిసిన వర్షాల కారణంగా పండ్లు, కూరగాయల తోటల్లో నీరు నిల్వ ఉండడంతో పంటల ఎదుగుదల లోపించడం, తెగుళ్లు ఆశించడం వంటి సమస్యలు తలెత్తాయి. రైతులు మేలైన యాజమాన్య పద్ధతులు పాటించాలని, పంటలను కాపాడుకోవాలని అదిలాబాద్ కృషి విజ్ఞాన కేంద్రం శాస్త్రవేత్త డాక్టర్ సునీల్ కుమార్ సూచించారు.

మామిడి తోటల్లో కలుపు సమస్య అధికంగా ఉంటే పారక్వాట్ డైక్లోరైన్ అనే కలుపు మందును లీటర్ నీటికి 5 మిల్లీలీటర్ల చొప్పున కలిపి పిచికారి చేయాలి. పదేళ్లు దాటిన మామిడి తోటలకు సిఫార్సు చేసిన మేరకు ఎరువులు అందించాలి. ఆకుజల్లడ గూడు పురుగు నివారణకు ఎండిన గూళ్లను తొలగించి, క్లోరోపైరిఫాస్ పురుగుమందును లీటర్ నీటికి 2 మిల్లీలీటర్లు కలిపి పిచికారి చేయాలి.

జామ తోటల్లో నీరు నిల్వ ఉండకుండా తొలగించాలి. లేదంటే ఎండు తెగులు వచ్చే అవకాశం ఉంది. దీనిని నివారించడానికి కాపర్ ఆక్సిక్లోరైడ్ను లీటర్ నీటికి 3 గ్రాములు కలిపి మొక్క మొదలుకు పోయాలి.

టమాటాలో ఎదుగుదల తగ్గినట్లయితే 19:19 పోషకాలను లీటర్ నీటికి 10 గ్రాముల చొప్పున పిచికారి చేయాలి. కలుపు సమస్య ఉంటే మెట్రిబుజిన్ మందును 200 లీటర్ల నీటిలో 300 గ్రాములు కలిపి పిచికారి చేయాలి. వంకాయలో కాయ, మొగ్గ పురుగు ఆశిస్తే, ఆశించిన మొగ్గలను తుంచి లింగాకర్షక బుట్టలు ఎకరానికి 10 చొప్పున అమర్చాలి. ఎక్కువ ఉధృతి ఉంటే తయోడికార్బ్ లీటర్ నీటికి ఒక గ్రాము చొప్పున పిచికారి చేయాలి.

మిరప నారు మడి దశలో నారుకుళ్లు తెగులు కనిపిస్తే లీటర్ నీటికి 3 గ్రాముల కాపర్ ఆక్సిక్లోరైడ్ కలిపి మొక్కల మొదళ్లకు పోయాలి. బెండలో తెల్లదోమను నివారించేందుకు పసుపు రంగు జిగురు వలలు ఎకరానికి 10 చొప్పున అమర్చాలి. ఎసిఫేట్ పురుగుమందును లీటర్ నీటికి 1.5 మిల్లీలీటర్లు కలిపి పిచికారి చేయాలి. తీగజాతి కూరగాయల్లో అడపూలు రావడానికి బోరాక్స్ 2-3 గ్రాములు, 19:19 పోషకం 5 గ్రాములు లీటర్ నీటిలో కలిపి పిచికారి చేయాలి.

పసుపులో ఇనుప ధాతు లోపం కనిపిస్తే ఫెర్రస్ సల్ఫేట్ 5 గ్రాములు లీటర్ నీటిలో కలిపి పిచికారి చేయాలని శాస్త్రవేత్త తెలిపారు. ఈ యాజమాన్య పద్ధతులు పాటిస్తే పంటల నష్టాన్ని తగ్గించుకోవచ్చునని సూచించారు.