రాజమహేంద్రవరంలో ఓపెన్ థియేటర్: గోదావరి తీరాన ఉచిత సినిమా ప్రదర్శన

రాజమహేంద్రవరంలోని కోటిలింగాల ఘాట్‌లో ప్రభుత్వం 'గోదావరి టాకీస్' పేరుతో ఓపెన్ థియేటర్‌ను ఏర్పాటు చేసింది. ఇది ప్రజలకు ఉచితంగా సినిమా వీక్షించే అవకాశాన్ని కల్పిస్తోంది.

ప్రతి శని, ఆదివారాల్లో సాయంత్రం వేళల్లో ఇక్కడ సినిమాలు ప్రదర్శిస్తున్నారు. నదీ తీరంలోని మెట్లపై సుమారు వెయ్యి మంది కూర్చుని సినిమా చూడవచ్చు. భారీ స్క్రీన్, సౌండ్ సిస్టంతో థియేటర్ అనుభూతిని అందిస్తున్నారు.

వచ్చే ఏడాది జరగనున్న గోదావరి పుష్కరాల సందర్భంగా భక్తులు, పర్యాటకులకు ఆధ్యాత్మిక వాతావరణంతో పాటు వినోదం అందించేందుకు ప్రభుత్వం ఈ ఘాట్‌ను అభివృద్ధి చేస్తోంది. లైటింగ్, భద్రత ఏర్పాట్లు పూర్తయ్యాయి.

ఓపెన్ థియేటర్‌లో సినిమాలు చూసేందుకు స్థానికులతో పాటు విదేశాల నుంచి వచ్చిన వారు కూడా ఆసక్తి చూపుతున్నారు. ఇక్కడ సినిమాలే కాకుండా లఘు చిత్రాలు, స్థానిక కళాకారుల సాంస్కృతిక ప్రదర్శనలు కూడా చోటు చేసుకుంటున్నాయి. ఈ ప్రాజెక్ట్ పర్యాటకానికి ఊతాన్ని ఇస్తుందని నగరవాసులు అభిప్రాయపడుతున్నారు.