రాజస్థాన్: రూ.500 కోల్పోయిన బాలికలను వివస్త్ర చేయించిన టీచర్ సస్పెండ్

రాజస్థాన్‌లోని లివాలి గ్రామంలో గల ప్రభుత్వ సీనియర్ సెకండరీ పాఠశాలలో ఓ టీచర్ తన వద్ద రూ.500 నోటు పోయిందని అనుమానంతో 9వ, 11వ తరగతుల బాలికలను గదిలో బంధించి, బట్టలు విప్పించి తనిఖీ చేసింది. టీచర్ సరస్వతి అనే ఆమె తరగతి గదిలో డబ్బు పోగొట్టుకున్నందుకు విద్యార్థినులపై అనుమానం వచ్చిందని, వారిని ఒక గదిలో బంధించి దుస్తులు తొలగించి శోధించినట్లు పోలీసులు తెలిపారు.

ఈ ఘటన జరిగిన వెంటనే తల్లిదండ్రులు పాఠశాల వద్దకు చేరుకుని నిరసన వ్యక్తం చేశారు. సమాచారం అందుకున్న బామన్‌వాస్ బ్లాక్ విద్యా అధికారి (సీబీఈఓ) ప్రతిభా మీనా, పోలీసులు సంఘటనా స్థలానికి చేరుకుని దర్యాప్తు ప్రారంభించారు. విద్యార్థినుల వాంగ్మూలాలు, వాస్తవ నివేదిక ఆధారంగా టీచర్‌ను దోషిగా నిర్ధారించి, సవాయి మాధోపూర్, భరత్‌పూర్ జిల్లా విద్యాధికారుల ఆదేశాలతో సరస్వతిని సస్పెండ్ చేశారు. ఆమెను ధౌల్‌పూర్ జిల్లా రాజాఖేడాకు ట్రాన్స్‌ఫర్ చేసి, విధుల నుంచి తొలగించినట్లు అధికారులు వెల్లడించారు.

ఈ సంఘటన తర్వాత తల్లిదండ్రుల ముందు టీచర్ సరస్వతి క్షమాపణలు చెప్పారు. భవిష్యత్తులో ఇలాంటి తప్పు చేయనని, విద్యార్థుల తనిఖీ చేయనని హామీ ఇచ్చినట్లు సమాచారం. అయితే, తల్లిదండ్రుల ఆగ్రహం, గ్రామస్థుల ఆందోళనతో అధికారులు వెంటనే చర్యలు తీసుకోవాల్సి వచ్చింది.

ప్రస్తుతం ఈ కేసులో దర్యాప్తు కొనసాగుతోంది. నిందిత టీచర్‌పై క్రమశిక్షణా చర్యలతో పాటు చట్టపరమైన చర్యలు తీసుకుంటామని పోలీసులు తెలిపారు.