మంచి ఉపాధ్యాయుడి బదిలీ రద్దు చేయాలని, మద్యం తాగే టీచర్లపై చర్యలు తీసుకోవాలని రత్లాం విద్యార్థుల నిరసన

మధ్యప్రదేశ్‌లోని రత్లాం జిల్లా కలెక్టరేట్ ముందు రెండు ప్రభుత్వ పాఠశాలల విద్యార్థులు నిరసన ప్రదర్శించారు. ఒక స్కూల్ పిల్లలు తమ మంచి ఉపాధ్యాయుడి బదిలీని రద్దు చేయాలని డిమాండ్ చేశారు. మరో స్కూల్ విద్యార్థులు క్లాస్‌రూమ్‌లో మద్యం తాగే ఇద్దరు టీచర్లను బదిలీ చేయాలని కోరారు.

రూపనగర్ గ్రామంలోని ప్రభుత్వ పాఠశాల ఉపాధ్యాయుడు బద్రీలాల్ రాథోడ్‌ను విద్యాశాఖ బదిలీ చేసింది. ఈ స్కూల్‌ను ఆయన బాగా తీర్చిదిద్దాడని, పిల్లలందరూ ప్రభుత్వ పాఠశాలలోనే చదువుతున్నారని విద్యార్థులు తెలిపారు. బద్రీలాల్‌ను తిరిగి అదే స్కూల్‌లో ఉంచాలని కోరుతూ విద్యార్థులు 65 కిలోమీటర్ల దూరం నుంచి కలెక్టరేట్‌కు వచ్చి నిరసన తెలిపారు.

అదే జిల్లాలోని మరో ప్రాథమిక పాఠశాలలో హరీష్ చౌహాన్, సునీల్ జోషి అనే టీచర్లు తరగతి గదిలోనే మద్యం తాగి గొడవ చేస్తున్నారని విద్యార్థులు ఆరోపించారు. దీనికి సంబంధించిన వీడియోలను గ్రామస్థులు అధికారులకు చూపించారు. గతంలో ఎన్నిసార్లు ఫిర్యాదు చేసినా చర్యలు తీసుకోలేదని, దీంతో విద్యార్థులు 50 కిలోమీటర్ల నుంచి వచ్చి కలెక్టరేట్ ఎదుట నిరసన వ్యక్తం చేశారు.

ఈ ఘటనపై స్పందించిన అదనపు జిల్లా మేజిస్ట్రేట్ (ఏడీఎం), మద్యం తాగిన టీచర్లపై వెంటనే విచారణ జరిపి కఠిన చర్యలు తీసుకోవాలని అధికారులను ఆదేశించారు. రెండు స్కూళ్ల విద్యార్థులు ఒకే రోజు నిరసన చేపట్టడం స్థానికంగా చర్చనీయాంశమైంది.