KTR ఆదిలాబాద్ CCI ప్లాంట్ పునరుద్ధరణపై కేంద్ర మంత్రి కుమారస్వామిని కలిశారు; CM రేవంత్‌పై సంచలన ఆరోపణలు

BRS నేత KTR నేడు కేంద్ర హెవీ ఇండస్ట్రీస్ మంత్రి HD కుమారస్వామిని కలిసి ఆదిలాబాద్ CCI ప్లాంట్ పునరుద్ధరణ విషయమై చర్చించారు. మాజీ మంత్రి జోగు రామన్న, రాజ్యసభ సభ్యుడు వద్దిరాజు రవిచంద్ర, CCI సాధన సమితి సభ్యులతో కలసి ఈ సమావేశం జరిగింది.

1980వ దశకంలో ఏర్పాటైన సిమెంట్ కార్పొరేషన్ ఆఫ్ ఇండియా ప్లాంట్ ఒకప్పుడు ఆదిలాబాద్ జిల్లాలో 6,000 మందికి ప్రత్యక్షంగా, పరోక్షంగా ఉపాధి కల్పించింది. 4 లక్షల మెట్రిక్ టన్నుల సామర్థ్యం కలిగిన ఈ ప్లాంట్‌లో 100 సంవత్సరాలకు సరిపడా సున్నపురాయి నిల్వలు ఉన్నాయని KTR తెలిపారు.

మంత్రి కుమారస్వామి స్పందిస్తూ, CCI సాధన సమితి చేస్తున్న పోరాటం అభినందనీయమని పేర్కొన్నారు. ప్లాంట్ పునరుద్ధరణకు 2,000 కోట్ల పెట్టుబడి అవసరమని, అందులో రాష్ట్ర ప్రభుత్వం 250 కోట్లు, కేంద్ర ప్రభుత్వం 250 కోట్లు పెట్టినట్లయితే మిగిలిన మొత్తం రుణం రూపంలో సమకూర్చవచ్చని వివరించారు. అయితే రాష్ట్ర ప్రభుత్వం మైనింగ్ లీజు పొడిగింపు, పెట్టుబడి ప్రోత్సాహకాలపై స్పందించడం లేదని కుమారస్వామి ఆందోళన వ్యక్తం చేశారు.

KTR మాట్లాడుతూ, తాము గతంలో అధికారంలో ఉన్నప్పుడు ఆదిలాబాద్ జిల్లాలోనే సిర్పూర్ పేపర్ మిల్లును తిరిగి నడిపించారని గుర్తు చేశారు. ప్లాంట్ పునరుద్ధరణకు రాష్ట్ర ప్రభుత్వం వెంటనే మైనింగ్ లీజు పొడిగించాలని, GST మినహాయింపు, విద్యుత్ రాయితీ, మూలధన సబ్సిడీ వంటి ప్రోత్సాహకాలు ప్రకటించాలని డిమాండ్ చేశారు.

సూర్యాపేట జిల్లాలో రైతులు రక్తంతో నిరసన చేస్తున్న విషయాన్ని ప్రస్తావిస్తూ, CM రేవంత్ రెడ్డిని తీవ్రంగా విమర్శించారు. కన్నపల్లి వద్ద పంపులు ఆన్ చేసి పంట పొలాలకు నీళ్ళు ఇవ్వాలని, మేడిగడ్డ వ్యవహారంలో NDSA ను అడ్డం పెట్టుకుని రాజకీయం చేయడం మాని రైతులకు న్యాయం చేయాలని KTR కోరారు.

హైదరాబాద్ ఎయిర్‌పోర్ట్ మెట్రో విషయంలో కూడా KTR మాట్లాడుతూ, 2023లో BRS ప్రభుత్వం శంకుస్థాపన చేసి టెండర్ పూర్తి చేసిన మెట్రో ప్రాజెక్టును రేవంత్ రెడ్డి రద్దు చేశారని ఆరోపించారు. ఇప్పుడు హైదరాబాద్ కార్పొరేషన్ ఎన్నికలను దృష్టిలో పెట్టుకుని మళ్ళీ మెట్రో గురించి మాట్లాడుతున్నారని విమర్శించారు.

L&T కంపెనీ భూముల విషయంలో రేవంత్ రెడ్డిపై తీవ్ర ఆరోపణలు చేశారు. 280 ఎకరాల విలువైన నగర భూముల మీద కన్నేసి, తన అన్నదమ్ములకు, బినామీలకు కట్టబెట్టడానికే రాష్ట్ర ప్రజల నెత్తిన 14,000 కోట్ల L&T రుణాన్ని బలవంతంగా మోపారని ఆరోపించారు. ఈ నిజాలన్నీ రాబోయే రోజుల్లో బయటికి వస్తాయని హెచ్చరించారు.