నటుడు రామ్ చరణ్ కు కోయంబత్తూరులో విజయవంతంగా మణికట్టు శస్త్రచికిత్స

నటుడు రామ్ చరణ్ కుడిచేతి మణికట్టు సమస్యకు కోయంబత్తూరులోని గంగా ఆసుపత్రిలో శస్త్రచికిత్స జరిగింది. ఈ శస్త్రచికిత్స విజయవంతమైనట్లు వైద్యులు తెలిపారు.

గంగా ఆసుపత్రి చీఫ్ ఆర్థోపెడిక్ సర్జన్ డాక్టర్ ఎన్. రాజశేఖరన్ నేతృత్వంలో ఈ సర్జరీ జరిగింది. అమెరికాలోని మియామీకి చెందిన ప్రముఖ హ్యాండ్ అండ్ రిస్ట్ సర్జన్ డాక్టర్ అల్హాండ్రో బాడియా ఈ సర్జరీ కోసం ప్రత్యేకంగా కోయంబత్తూర్ వచ్చారు. డాక్టర్ ప్రవీణ్ భరద్వాజ్ సహా నిపుణుల బృందం శస్త్రచికిత్సను విజయవంతంగా పూర్తి చేసింది.

గతంలో నటుడు చిరంజీవికి సంక్లిష్టమైన వెన్నెముక శస్త్రచికిత్స చేసింది కూడా డాక్టర్ రాజశేఖరనే అని ఆసుపత్రి వర్గాలు తెలిపాయి.

రామ్ చరణ్ నాలుగు రోజులు విశ్రాంతి తీసుకుంటారు. ఆయన కుటుంబ సభ్యులు చిరంజీవి, సురేఖ, ఉపాసన కూడా ఈ నాలుగు రోజులూ కోయంబత్తూరులోనే ఉంటారు. విశ్రాంతి తర్వాత హైదరాబాద్ కు తిరిగి వస్తారు.

అభిమానులు ఆయన త్వరగా కోలుకుని మళ్లీ షూటింగ్ లో పాల్గొనాలని ఆకాంక్షించారు.