రామ మందిర్ విరాళాల వివాదం: సిట్ విచారణపై నృపేంద్ర మిశ్రా స్పందన

శ్రీరామ జన్మభూమి తీర్థ క్షేత్ర ట్రస్ట్‌లో జరిగిన విరాళాల కుంభకోణ ఆరోపణలపై స్పెషల్ ఇన్వెస్టిగేషన్ టీం (సిట్) దర్యాప్తు ఐదవ రోజుకు చేరుకుంది. ఈ నేపథ్యంలో శ్రీరామ జన్మభూమి నిర్మాణ కమిటీ చైర్మన్, ప్రధాని మోడీ మాజీ ప్రధాన కార్యదర్శి నృపేంద్ర మిశ్రా స్పందించారు. విరాళాల లెక్కింపు సమయంలో సీసీటీవీ సిస్టమ్‌లో తారుమారు, నిధులు మాయం అయినట్టు ఆరోపణలు వచ్చిన నేపథ్యంలో ఉత్తరప్రదేశ్ ముఖ్యమంత్రి యోగి ఆదిత్యనాథ్ ప్రతిపక్ష సమాజ్‌వాదీ పార్టీపై తీవ్ర విమర్శలు చేశారు. కార్‌సేవకులపై కాల్పులు, జైశ్రీరామ్ నినాదాలు చేసిన వారిపై లాఠీచార్జ్ చేసిన వారే ఇప్పుడు ఉపన్యాసాలు ఇస్తున్నారని ఆయన ధ్వజమెత్తారు. భక్తుల భావోద్వేగాలకు భంగం కలిగించేలా ఏమీ మాట్లాడొద్దని హెచ్చరించారు.

ఈ క్రమంలో ఇండియా టుడే ప్రత్యేక ఇంటర్వ్యూలో నృపేంద్ర మిశ్రా మాట్లాడుతూ ఈ పరిణామం చాలా బాధాకరమని, భక్తుల విశ్వాసాన్ని దెబ్బతీసిందని అన్నారు. నాలుగు లక్షల గ్రామాల నుంచి దాదాపు 3,500 కోట్ల రూపాయలు విరాళంగా వచ్చాయని, ఇప్పుడు ఆ భక్తులంతా తమ సొమ్ము ఏమైందో తెలుసుకోవాలనుకుంటున్నారని స్పష్టం చేశారు. ట్రస్ట్ నిర్వహణ పూర్తిగా అనధికారికంగా, విశ్వాసం ఆధారంగా సాగిందని, దీనివల్లే తాత్కాలిక వైఫల్యాలు ఎదురైనట్టు వివరించారు. ఆలయ నిర్మాణంలో కఠిన నియమాలు పాటించినా, విరాళాల నిర్వహణ విషయంలో మాత్రం అనధికారిక పద్ధతులు అనుసరించడమే సమస్యకు కారణమైందని అభిప్రాయపడ్డారు.

భవిష్యత్తులో ఇలాంటి సంఘటనలు జరగకుండా కఠిన చర్యలు అవసరమని మిశ్రా పేర్కొన్నారు. ట్రస్ట్ కార్యకలాపాలకు ప్రత్యేకంగా అనుభవజ్ఞులతో కూడిన అధికారిక పరిపాలనను ఏర్పాటు చేయాలని, నిర్మాణ విభాగాన్ని వేరుగా ఉంచాలని సూచించారు. ప్రతి 15 రోజుల నుంచి నెలకు ఒకసారి పని ఆడిట్ చేయాలని, ప్రతి వర్క్ స్టేషన్‌కు సంబంధించి విధివిధానాల మాన్యువల్ తయారు చేయాలని చెప్పారు. విరాళాలను నగదు రహితం చేయాలన్న సూచనలు వచ్చినా, భక్తులు దేవుడి ముందు బంగారం లాంటి విలువైన వస్తువులు సమర్పించే విశ్వాసాన్ని పరిగణనలోకి తీసుకోవాలని, అయితే సీసీటీవీ నిఘా, విలువైన వస్తువుల అంచనా విధానాన్ని పూర్తిగా పునర్వ్యవస్థీకరించాల్సిన అవసరం ఉందని వివరించారు. సిట్ దర్యాప్తు పారదర్శకంగా సాగాలని, దోషులపై కఠిన చర్యలు తీసుకోవాలని ఆశిస్తున్నట్టు మిశ్రా ఈ సందర్భంగా తెలిపారు. ఆలయ నిర్మాణ బాధ్యతలు దాదాపు ముగిసే సమయంలో ఈ ఆరోపణలు తీవ్ర మనస్తాపం కలిగించాయని అన్నారు.