రామగుండంలో భారీ వర్షం: కాలనీలు జలమయం, రోడ్లు నీట మునిగాయి

పెద్దపల్లి జిల్లా రామగుండం కార్పొరేషన్‌లో ఎడతెరిపి లేని భారీ వర్షం కారణంగా పలు కాలనీలు వరద నీటిలో మునిగాయి. అడ్డగుంటపల్లి, రామ్‌నగర్, విట్టల్‌నగర్, మల్కాపూర్ పవర్‌హౌస్ కాలనీల్లో ఇండ్లలోకి నీరు చేరడంతో ఇంటి వస్తువులు తడిసిపోయాయి.

ప్రధాన నాలాలు పూడిక తీయకపోవడంతో కొన్ని ప్రాంతాల్లో వరద నీరు రోడ్లపైకి చేరి రాకపోకలకు అంతరాయం కలిగించింది. రోడ్లపై నీరు నిలిచి చెరువుల మాదిరిగా కనిపించాయి.

అడ్డగుంటపల్లికి చెందిన ఒక నివాసి మాట్లాడుతూ, గత 30 ఏళ్లుగా తమ వార్డుకు సరైన రోడ్లు, లైట్లు, డ్రైనేజీ లేవని ఆవేదన వ్యక్తం చేశారు. ఇల్లు కూలిపోయే స్థితిలో ఉందని, మున్సిపల్ కమిషనర్ తమను ఆదుకోవాలని ఆయన విజ్ఞప్తి చేశారు.

ప్రస్తుతం బాధిత ప్రాంతాల్లో నీరు నిలిచి ఉండగా, పురపాలక అధికారుల నుంచి ఎలాంటి స్పందన లేదు.