మాజీ సీఎస్ రామకృష్ణరావు: తెలంగాణ ఆర్థిక ప్రగతి దేశానికే ఆదర్శం

హైదరాబాద్‌లో CII నిర్వహించిన తెలంగాణ చీఫ్ ఫైనాన్షియల్ ఆఫీసర్ల (CFO) సదస్సులో రాష్ట్ర మాజీ ప్రధాన కార్యదర్శి కే రామకృష్ణరావు మాట్లాడారు. తెలంగాణ ఆర్థిక ప్రగతి దేశానికే ఆదర్శంగా నిలుస్తుందని, రాష్ట్రం ఏర్పడిన తర్వాత కీలక ఆర్థిక సూచికల్లో గణనీయమైన పురోగతి సాధించిందని ఆయన పేర్కొన్నారు.

2014లో రాష్ట్ర తొలి బడ్జెట్ దాదాపు లక్ష కోట్ల రూపాయలు కాగా, ప్రస్తుత ఆర్థిక సంవత్సరానికి అది 3.24 లక్షల కోట్ల రూపాయలకు చేరిందని రామకృష్ణరావు తెలిపారు. అప్పట్లో సుమారు 60 వేల కోట్ల రూపాయలుగా ఉన్న వాస్తవ వ్యయం గత ఏడాది 2.4 లక్షల కోట్ల రూపాయలకు పెరిగిందన్నారు. తెలంగాణ జీఎస్‌డీపీ 5 లక్షల కోట్ల రూపాయల నుంచి 18 లక్షల కోట్ల రూపాయలకు చేరుకుంది.

2014లో తలసరి ఆదాయంలో 10వ స్థానంలో ఉన్న తెలంగాణ, ఇప్పుడు రూ. 4.3 లక్షల తలసరి ఆదాయంతో దేశంలో మూడో స్థానంలో నిలిచిందని, సిక్కిం, గోవా మాత్రమే తెలంగాణ కంటే ముందున్నాయని ఆయన చెప్పారు. పరిశ్రమలు, పెట్టుబడులు, నైపుణ్యాభివృద్ధికి బీఆర్‌ఎస్ ప్రభుత్వం ప్రాధాన్యత ఇవ్వడమే ఈ పురోగతికి కారణమని రామకృష్ణరావు వివరించారు.

ప్రస్తుత ముఖ్యమంత్రి రేవంత్ రెడ్డి బీఆర్‌ఎస్ పాలనను తీవ్రంగా విమర్శిస్తున్న సమయంలో మాజీ సీఎస్ చేసిన ఈ వ్యాఖ్యలు ప్రాధాన్యత సంతరించుకున్నాయి.

సీఎఫ్ఓలను ఉద్దేశించి రామకృష్ణరావు, మారుతున్న సాంకేతికత, ఆర్టిఫిషియల్ ఇంటెలిజెన్స్ (AI), భౌగోళిక రాజకీయ అనిశ్చిత పరిస్థితులకు అనుగుణంగా సంస్థలు ముందస్తు ప్రణాళికలు రూపొందించుకోవాలని సూచించారు. హైదరాబాదుకు పరిశ్రమలు, పెట్టుబడులు ఆకర్షించేలా సీఎఫ్ఓలు వ్యూహాలు సిద్ధం చేయాలని కోరారు. దక్షిణ, పశ్చిమ భారత రాష్ట్రాలు విద్య, నైపుణ్యంపై దృష్టి పెట్టడం వల్లే ఆర్థిక వృద్ధి వేగంగా జరిగిందని ఆయన అభిప్రాయపడ్డారు.

తెలంగాణ ఆర్థిక అభివృద్ధిపై రామకృష్ణరావు వ్యాఖ్యలు రాష్ట్ర ప్రగతిని మరోసారి చర్చలోకి తెచ్చాయి.