రంగారెడ్డిలో 2BHK ఫ్లాట్లకు లబ్ధిదారులు లేరు: నిబంధనల సవరణ పరిశీలన

రంగారెడ్డి జిల్లాలోని బాచారం, బాటసింగారం ప్రాంతాల్లో నిర్మించిన డబుల్ బెడ్రూమ్ ఫ్లాట్లకు లబ్ధిదారులు దొరకడం లేదు. ప్రస్తుత నిబంధనల ప్రకారం కేటాయింపులు జరగడం లేదని హౌసింగ్ అధికారులు తెలిపారు.

అబ్దుల్లాపూర్‌మేట్ మండలంలోని బాచారం, బాటసింగారం ప్రాంతాల్లో ప్రభుత్వం 1,600 డబుల్ బెడ్రూమ్ ఫ్లాట్లను సిద్ధం చేసింది. ఇందులో దాదాపు 1,000 ఫ్లాట్ల నిర్మాణం పూర్తయింది. కానీ ఇప్పటివరకు కేటాయింపులు జరగలేదు. ఈ ఫ్లాట్లు నెలల తరబడి ఖాళీగా ఉంటున్నాయి.

ఫ్లాట్లు ఉన్న ప్రాంతానికి 3 నుంచి 5 కిలోమీటర్ల పరిధిలో నివసించే వారికే కేటాయింపు చేయాలని నిబంధన ఉంది. ఈ పరిధిని 7 కిలోమీటర్లకు పెంచినా లబ్ధిదారులు కనిపించలేదని అధికారులు అంటున్నారు. ఈ విషయంపై హౌసింగ్ శాఖ అధికారులు ప్రభుత్వానికి సమగ్ర నివేదిక ఇచ్చారు. ప్రస్తుత నిబంధనలు కొనసాగితే ఈ ఫ్లాట్లు ఉపయోగపడకుండా పోతాయని హౌసింగ్ మంత్రి పొంగులేటి శ్రీనివాస్ రెడ్డి దృష్టికి తీసుకెళ్లారు.

దీంతో కేటాయింపు నిబంధనను సడలించే దిశగా ప్రభుత్వం ఆలోచిస్తోంది. హైదరాబాద్, రంగారెడ్డి, మేడ్చల్ పరిధిలోని 3 నుంచి 7 కిలోమీటర్ల పరిధి అంశాన్ని ప్రభుత్వం పరిశీలిస్తోంది. ఇదే సమస్య మరికొన్ని నియోజకవర్గాల్లోనూ ఉందని అధికారులు చెబుతున్నారు.

ఇండ్లు లేని పేదలకు ఇచ్చేందుకు గత ప్రభుత్వం డబుల్ బెడ్రూమ్ ఇండ్ల నిర్మాణాలు చేపట్టింది. కొన్ని చోట్ల నిర్మాణాలు పూర్తికాకుండా ఉండిపోయాయి. ఆ పెండింగ్ పనులు పూర్తి చేయించి లబ్ధిదారులకు ఇచ్చేందుకు ప్రస్తుత ప్రభుత్వం చర్యలు తీసుకుంటోంది.

వచ్చే క్యాబినెట్ భేటీలో ఈ నిబంధనల సవరణపై చర్చించి ప్రత్యేక వెసులుబాటు కల్పించే అవకాశం ఉంది. క్యాబినెట్ ఆమోదిస్తే లబ్ధిదారులను ఎంపిక చేసి ఫ్లాట్లను అప్పగిస్తామని అధికారులు చెబుతున్నారు.