ఎల్లంపల్లి నుండి మధ్యమానేరుకు కాళేశ్వరం నీటి ఎత్తిపోతలు ప్రారంభం

తెలంగాణ ప్రభుత్వం బుధవారం మధ్యాహ్నం కాళేశ్వరం ప్రాజెక్టు లింక్-2 ద్వారా ఎల్లంపల్లి జలాశయం నుంచి మధ్యమానేరుకు నీటి ఎత్తిపోతలు ప్రారంభించింది. నాలుగు పంపుల ద్వారా 12,600 క్యూసెక్కుల నీటిని ఎత్తిపోస్తున్నారు. ఎల్లంపల్లిలో నాలుగు రోజుల క్రితం 7 నుంచి 8 టీఎంసీల నీరు మాత్రమే ఉండగా, ఇటీవలి వర్షాలతో 11 టీఎంసీలకు చేరింది. ఆగస్టు 2 వరకు ఎత్తిపోతలు కొనసాగిస్తామని అధికారులు తెలిపారు.

ఈ ఎత్తిపోతల వల్ల మధ్యమానేరు నుంచి హైదరాబాద్ తాగునీటి అవసరాలు, ఎన్టీపీసీ, ఆర్ఎఫ్సీఎల్ వంటి సంస్థల నీటి అవసరాలు తీరనున్నాయి. రెండు రోజులుగా కురుస్తున్న వర్షాలతో ఎల్లంపల్లి క్యాచ్‌మెంట్ ఏరియా నుంచి 76,000 క్యూసెక్కుల ఇన్‌ఫ్లో వస్తోంది.

కాళేశ్వరం ప్రాజెక్టుపై గతంలో విమర్శలు చేసిన కాంగ్రెస్ ప్రభుత్వం ఇప్పుడు ఎత్తిపోతలు ప్రారంభించడం గమనార్హం. బీఆర్ఎస్ నాయకులు నీటిని ఎత్తిపోయాలని గత రెండు రోజులుగా డిమాండ్ చేస్తున్నారు. ఈ నేపథ్యంలో ప్రభుత్వం నిర్ణయం తీసుకుంది.

కరీంనగర్ జిల్లా రామారడుగు మండలంలోని గాయత్రి పంప్ హౌస్ వద్ద ఎత్తిపోతలు ప్రారంభమయ్యాయి. బీఆర్ఎస్ నాయకులు ఈ నిర్ణయాన్ని స్వాగతించారు. నీటిపారుదల రంగంలో కాళేశ్వరం ప్రాజెక్టు కీలకమని నిపుణులు అభిప్రాయపడ్డారు.