కేసీఆర్ దత్తత తీసుకున్న వాసాలమర్రిలో ఇందిరమ్మ ఇళ్లను ప్రారంభించనున్న సీఎం రేవంత్ రెడ్డి

తెలంగాణ ముఖ్యమంత్రి రేవంత్ రెడ్డి మాజీ సీఎం కేసీఆర్ దత్తత తీసుకున్న నల్గొండ జిల్లా వాసాలమర్రి గ్రామంలో ఈ నెల రెండవ వారంలో పర్యటించే అవకాశం ఉంది. ఆ సందర్భంగా ఇందిరమ్మ ఇళ్ల పథకం కింద నిర్మించిన ఇళ్లను ఆయన ప్రారంభిస్తారు. గ్రామస్థులతో కలిసి సహపంక్తి భోజనం చేసి, బహిరంగ సభ నిర్వహిస్తారు.

2020 నవంబర్‌లో కేసీఆర్ ఈ గ్రామాన్ని దత్తత తీసుకుని, మోడల్ విలేజ్‌గా తీర్చిదిద్దుతానని హామీ ఇచ్చారు. 2021లో ఆయన అక్కడ పర్యటించారు. అయితే ఆ హామీలు నెరవేరలేదని, కేసీఆర్‌తో కలిసి భోజనం చేసిన మహిళ ఇల్లు కూడా రోడ్డు విస్తరణలో కూల్చివేతకు గురైందని అధికార వర్గాలు చెబుతున్నాయి.

ప్రస్తుత ప్రభుత్వం ఇందిరమ్మ ఇల్ల పథకం కింద వాసాలమర్రిలో 143 ఇండ్ల నిర్మాణానికి ఆమోదించింది. వీటిలో 74 ఇళ్ల నిర్మాణం పూర్తయ్యింది. 32 మంది అత్యంత పేద లబ్ధిదారులకు ప్రభుత్వమే పూర్తిగా ఇళ్లను నిర్మించి ఇచ్చేలా ఏర్పాట్లు చేసింది. మొదటి లబ్ధిదారుగా ఆకులు ఆగవ ఎంపికయ్యారు. మిగిలిన ఇళ్ల నిర్మాణం 15-20 రోజుల్లో పూర్తి చేసేందుకు అధికారులు చర్యలు తీసుకుంటున్నారు. శ్రావణ మాసంలో గృహ ప్రవేశాలు నిర్వహించాలని ప్రభుత్వం భావిస్తోంది.

ఈ పర్యటనలో గత ప్రభుత్వం డబుల్ బెడ్‌రూమ్ ఇళ్లు ఇవ్వలేదని, తాము ఎన్నికల హామీలను అమలు చేస్తున్నామనే సందేశాన్ని కాంగ్రెస్ నేతలు బలంగా వినిపించనున్నారు. బీఆర్‌ఎస్ పార్టీ ఈ విషయంలో స్పందించాల్సి ఉంది.