విద్య ర్యాంకింగ్‌లో తెలంగాణ మెరుగుదల: సీఎం రేవంత్ రెడ్డి ప్రకటన

ముఖ్యమంత్రి రేవంత్ రెడ్డి ప్రభుత్వ పాఠశాలలపై ప్రత్యేక దృష్టి సారించారు. 16 సంవత్సరాల తర్వాత 22 వేల మంది ఉపాధ్యాయులకు ప్రమోషన్లు, 10 సంవత్సరాల తర్వాత 35 వేల మంది ఉపాధ్యాయులకు బదిలీలు చేసినట్లు ఆయన తెలిపారు.

ఉపాధ్యాయ బదిలీలు చట్టపరమైన సవాళ్లతో కూడుకున్నవని, అయినా ఈ సారి ఎలాంటి లిటిగేషన్ లేకుండా ఈ చర్యలు చేపట్టామని సీఎం చెప్పారు. ఉపాధ్యాయులు ప్రభుత్వ ఉద్దేశాన్ని అర్థం చేసుకుని సహకరించారని ఆయన పేర్కొన్నారు.

కేంద్ర ప్రభుత్వం విడుదల చేసిన నివేదికల్లో తెలంగాణ విద్యా శాఖ ర్యాంకింగ్ గతంలో 35, 36 స్థానాల్లో ఉండేదని, ఇటీవలి నివేదికలో 18వ స్థానానికి ఎదిగిందని సీఎం రేవంత్ రెడ్డి అన్నారు.

రాష్ట్రంలో లక్ష మందికి పైగా ఉపాధ్యాయులు ఉన్నారని, విద్యారంగ బడ్జెట్ 30 వేల కోట్ల రూపాయలని సీఎం వివరించారు. ఈ విజయం ఉపాధ్యాయుల కృషి వల్ల సాధ్యమైందని, అయితే తృప్తి చెందకుండా దేశంలో మొదటి రెండు స్థానాల్లో నిలబడేలా పనిచేయాలని ఆయన ఉపాధ్యాయులకు విజ్ఞప్తి చేశారు.