2034 నాటికి కోటి మంది మహిళలను కోటీశ్వరులను చేస్తామని సీఎం రేవంత్ రెడ్డి ప్రకటన

మేడ్చల్ జిల్లా నాచారంలో బాలామృతం ప్లాంట్‌ను సీఎం రేవంత్ రెడ్డి, మంత్రి సీతక్కతో కలిసి ప్రారంభించారు. ఈ సందర్భంగా మహిళా సాధికారత, డిజిటల్ గవర్నెన్స్‌పై పలు ప్రకటనలు చేశారు.

2034 సంవత్సరం నాటికి కోటి మంది మహిళలను ఆర్థికంగా ఎదిగేలా చేస్తామని సీఎం ప్రకటించారు. గర్భిణీ స్త్రీల నుంచి ఆరేళ్ల లోపు పిల్లల వరకు పౌష్టికాహారం అందిస్తామని తెలిపారు. హైదరాబాద్‌లో లక్ష ఇందిరమ్మ ఇళ్లు నిర్మించి పేదలకు అందిస్తామన్నారు.

రాష్ట్రంలో డిజిటల్ గవర్నెన్స్ కోసం ఒక కమిటీని నియమించనున్నట్లు చెప్పారు. 100 రోజుల్లో కమిటీ నివేదిక సమర్పించాలని ఆదేశించారు. ప్రభుత్వ ఉద్యోగులతో పాటు కాంట్రాక్ట్, అవుట్‌సోర్సింగ్ ఉద్యోగుల జీతాలు ప్రతి నెల మొదటి తేదీన అందేలా వ్యవస్థను డిజిటలైజ్ చేయాలన్నారు. చెల్లింపులు అందినా జీతాలు చెల్లించని ఏజెన్సీలపై కఠిన చర్యలు తీసుకుంటామని హెచ్చరించారు.

బాలామృతం ప్లాంట్ ద్వారా చిన్నారులు, బలహీన గర్భిణీ స్త్రీలకు కావాల్సిన పోషకాహారం తయారు చేస్తారు. 50 ఏళ్ల కిందట కాంగ్రెస్ ప్రభుత్వం ఈ ప్రాంతంలో అంగన్‌వాడీ కేంద్రాలకు పునాది వేసిందని మంత్రి సీతక్క గుర్తు చేశారు.