ఢిల్లీ పర్యటనలో సీఎం రేవంత్ రెడ్డి: కేంద్ర మంత్రులు, కాంగ్రెస్ నేతలతో భేటీ

తెలంగాణ ముఖ్యమంత్రి రేవంత్ రెడ్డి ఢిల్లీ పర్యటనలో ఉన్నారు. ఆయన నేడు పలువురు కేంద్ర మంత్రులతో సమావేశాలు నిర్వహించనున్నారు. రాష్ట్ర అభివృద్ధి ప్రాజెక్టులు, బడ్జెట్ కేటాయింపులు, మౌలిక సదుపాయాలు, విభజన హామీల అమలు తదితర అంశాలపై కేంద్ర మంత్రులకు వినతి పత్రాలు సమర్పించనున్నారు.

తెలంగాణకు రావాల్సిన నిధులు, అభివృద్ధి పనులకు సంబంధించి సహకారం అందించాలని కేంద్ర మంత్రులను కోరనున్నారు. సంబంధిత శాఖల మంత్రులను వేర్వేరుగా కలిసే అవకాశం ఉంది.

ఇదే పర్యటనలో కాంగ్రెస్ అగ్రనేత రాహుల్ గాంధీ, ఏఐసీసీ అధ్యక్షుడు మల్లికార్జున ఖర్గేతో ప్రత్యేకంగా సమావేశం కానున్నారు. రాష్ట్రంలో కాంగ్రెస్ ప్రభుత్వం అమలు చేస్తున్న ముఖ్య పథకాల పురోగతి, పార్టీ పనితీరుపై అధిష్టానానికి సమగ్ర నివేదిక అందించనున్నారు.

పార్టీ సంస్థాగత బలోపేతం, జాతీయ స్థాయి వ్యూహాలు, పెండింగ్‌లో ఉన్న జిల్లా కాంగ్రెస్ కమిటీ అధ్యక్షుల నియామకాలపై చర్చించనున్నారు. రాష్ట్ర మంత్రివర్గ విస్తరణ, నామినేటెడ్ పోస్టుల భర్తీ, త్వరలో జరగనున్న స్థానిక సంస్థల ఎన్నికలకు పార్టీ యంత్రాంగాన్ని సమాయత్తం చేయడం వంటి అంశాలు కూడా చర్చకు రానున్నాయి.