ప్రమాద బీమాకు 14 బ్యాంకులతో ఒప్పందం, పీఆర్సీపై హామీ: సీఎం రేవంత్ రెడ్డి

తెలంగాణ సీఎం రేవంత్ రెడ్డి ప్రభుత్వ ఉద్యోగులతో సమావేశమయ్యారు. ఈ సమావేశంలో పెన్షనర్ల ప్రమాద బీమా పథకం కోసం ప్రభుత్వం 14 బ్యాంకులతో ఎంవోయూ కుదుర్చుకున్నట్లు ప్రకటించారు.

పీఆర్సీ విషయంలో ఇచ్చిన మాట నిలబెట్టుకుంటామని ఆయన హామీ ఇచ్చారు. ఆర్థిక పరిస్థితుల కారణంగా ఉద్యోగుల డిమాండ్లపై కొన్నిసార్లు త్వరగా నిర్ణయం తీసుకోలేకపోతున్నామని, దీనివల్లే ఒకటి కంటే ఎక్కువసార్లు ఆలోచించాల్సి వస్తుందని వివరించారు.

ప్రభుత్వానికి మంచి పేరు రావడంలో, ప్రతి పథకం అమల్లో ఉద్యోగుల కృషి చాలా ముఖ్యమని సీఎం పేర్కొన్నారు. కాంగ్రెస్ పార్టీ మరోసారి అధికారంలోకి వస్తే అది కూడా ఉద్యోగుల కృషితోనే సాధ్యమవుతుందని నమ్ముతున్నట్లు చెప్పారు.

అన్ని పథకాలు విజయవంతం కావడానికి ఉద్యోగులు అదనంగా మరో గంట కష్టపడి పని చేయాలని కోరారు. తాను ‘గుంపు మేస్త్రీ’ అని అన్నందుకు కొందరు ఎగతాళి చేశారని, అయితే ఆ గుంపంతా తనదేనని, తన బృందం మంచి పని చేస్తుందని రేవంత్ రెడ్డి స్పష్టం చేశారు.