అమెజాన్ డేటా సెంటర్ ప్రారంభించిన సీఎం రేవంత్; ఫ్యూచర్ సిటీలో రూ.లక్ష కోట్ల పెట్టుబడి కోరిక

సీఎం రేవంత్ రెడ్డి హైదరాబాద్‌లో అమెజాన్ డేటా సెంటర్‌ను ప్రారంభించారు. ఈ సందర్భంగా ఆయన మాట్లాడుతూ, తెలంగాణ 2047 నాటికి 3 ట్రిలియన్ డాలర్ల ఆర్థిక వ్యవస్థగా ఎదగాలని లక్ష్యంగా పెట్టుకుందన్నారు. ఇందుకోసం అమెజాన్ లాంటి సంస్థల భాగస్వామ్యం అవసరమని, ఫ్యూచర్ సిటీలో 2034 నాటికి కనీసం రూ.లక్ష కోట్ల పెట్టుబడి అవసరమని కోరారు. ప్రస్తుతం అమెజాన్ రాబోయే 14 ఏళ్లలో 7 బిలియన్ డాలర్లు పెట్టుబడి పెట్టాలని ప్రణాళిక రూపొందించినా, అది తమ లక్ష్యాలకు సరిపోదని సీఎం పేర్కొన్నారు.

తెలంగాణ రైజింగ్ 2047 అనే విధాన పత్రాన్ని రూపొందించినట్లు సీఎం తెలిపారు. ఈ పాలసీలో ఐఎస్‌బీ, గ్లోబల్ కన్సల్టెంట్లతో పాటు యాజయ్ బంగా, సత్య నాదెళ్ల, మాజీ ఆర్‌బీఐ గవర్నర్ రఘురామ్ రాజన్ లాంటి నిపుణుల సలహాలు తీసుకున్నట్లు చెప్పారు. ఇది సింగిల్ విండో అనుమతులు, భూ కేటాయింపు, ప్రోత్సాహకాలు అందించడం ద్వారా పెట్టుబడిదారులకు విశ్వాసం కలిగిస్తుందన్నారు. అలాగే, నగర ప్రాంతం (క్యూర్), శివారు పారిశ్రామిక ప్రాంతం (ప్యూర్), గ్రామీణ వ్యవసాయ ప్రాంతం (రేర్) అనే మూడు అంచెల ఆర్థిక నిర్మాణాన్ని వివరించారు.

కార్యక్రమంలో అమెజాన్ ప్రతినిధులు అనురాగ్, విక్రమ్, రాష్ట్ర ప్రభుత్వ అధికారులు పాల్గొన్నారు. ప్రతి నెలా అమెజాన్ బృందంతో సమీక్ష నిర్వహిస్తానని, అనుమతుల విషయంలో పూర్తి సహకారం అందిస్తామని సీఎం హామీ ఇచ్చారు.