సీఎం రేవంత్ రెడ్డి నేడు కొత్తకోట బాలికల పాఠశాల ప్రారంభించనున్నారు

ముఖ్యమంత్రి రేవంత్ రెడ్డి నేడు వనపర్తి జిల్లా కొత్తకోటలో పర్యటించనున్నారు. ఇక్కడ జెడ్పి బాలికల ఉన్నత పాఠశాల నూతన భవనాన్ని ప్రారంభించనున్నారు. ఈ భవనాన్ని కార్పొరేట్ సామాజిక బాధ్యత (సీఎస్ఆర్) నిధులతో రూ. 1.77 కోట్ల వ్యయంతో నిర్మించారు.

పాఠశాల నూతన భవనంలో డిజిటల్ తరగతి గదులు, కృత్రిమ మేధ (ఏఐ) తరగతి గదులు, కంప్యూటర్ ప్రయోగశాల, ఆటస్థలం, మెరుగైన మరుగుదొడ్లు వంటి సౌకర్యాలు ఏర్పాటు చేశారు. దేవరకద్ర ఎమ్మెల్యే మధుసూధన్ సీఎస్ఆర్ నిధుల సమీకరణ, నిర్మాణంలో కీలక పాత్ర పోషించారు.

గతంలో ఈ పాఠశాలకు సరైన భవనాలు లేక, విద్యార్థులు చెట్ల కింద కూర్చొని చదువుకోవాల్సిన పరిస్థితి ఉండేది. వర్షం పడితే తడిసి పుస్తకాలు నానేవి. ఇప్పుడు కొత్త భవనం అందుబాటులోకి రావడంతో సుమారు వెయ్యి మంది విద్యార్థులకు ప్రయోజనం కలుగనుంది.

ప్రారంభోత్సవంలో సీఎం రేవంత్ రెడ్డి విద్యార్థులతో ముఖాముఖీ నిర్వహిస్తారు. పాఠశాల విద్యార్థులు, సిబ్బంది కొత్త భవనం పట్ల సంతోషం వ్యక్తం చేశారు.