విద్యాశాఖకు అవసరమైన నిధులు ఇస్తా: సీఎం రేవంత్ రెడ్డి

ముఖ్యమంత్రి రేవంత్ రెడ్డి విద్యా శాఖకు నిధుల కొరత ఉండదని, ఎంత కావాలన్నా కేటాయిస్తామని స్పష్టం చేశారు. ప్రభుత్వ పాఠశాలల్లో విద్యా నాణ్యత పెంచేందుకు టీచర్లు మండలం వారీగా ప్రణాళికలు సిద్ధం చేయాలని ఆయన కోరారు.

గతంలో పై నుంచి నిర్ణయాలు తీసుకునే విధానం ఉండేది. ఇప్పుడు స్థానిక పరిస్థితులు తెలిసిన టీచర్ల నుంచి సూచనలు స్వీకరించి, కింది స్థాయి నుంచి ప్రణాళికలు తయారు చేయాలని సీఎం సూచించారు.

ఒకే గదిలో ఒక టీచర్ బోధించే పాఠశాలలు, ఒకటి నుంచి ఐదో తరగతి కలిపిన తరగతులు, ఉపాధ్యాయుల ప్రయాణ ఇబ్బందులు వంటి సమస్యలను ఆయన ప్రస్తావించారు. ఇలాంటి సమస్యలకు పరిష్కారంగా మండలాన్ని ఒక యూనిట్‌గా తీసుకుని క్లస్టర్ విధానం అమలు చేయాలని అన్నారు.

డిసెంబర్ నెలాఖరు లోపు టీచర్లు తమ ప్రతిపాదనలు సమర్పించాలని, వాటిని పరిశీలించి వచ్చే విద్యా సంవత్సరంలో అమలు చేస్తామని సీఎం తెలిపారు.

పాఠశాలల అభివృద్ధికి ఫిన్లాండ్, జర్మనీ వంటి దేశాల అనుభవాలను కూడా స్ఫూర్తిగా తీసుకోవచ్చని ఆయన అన్నారు. ప్రతిపాదనల స్వీకరణకు ఒక వెబ్‌సైట్ రూపొందిస్తామని, అవసరమైన టీచర్లకు హైదరాబాద్‌లోని ఎంసీఆర్ హెచ్ఆర్డీ ఇన్‌స్టిట్యూట్‌లో ఫౌండేషన్ కోర్సు శిక్షణ ఇస్తామని చెప్పారు.