విద్యలో నాణ్యతపై సీఎం రేవంత్ రెడ్డి దృష్టి; ప్రపంచంతో పోటీకి సిద్ధం కావాలన్నారు

తెలంగాణలో విద్యలో నాణ్యత మెరుగుపరచాలని ముఖ్యమంత్రి రేవంత్ రెడ్డి పిలుపునిచ్చారు. ప్రస్తుతం విద్య అందుబాటులోకి వచ్చిందని, ఆకలి సమస్య తీరిందని, కానీ ప్రపంచంతో పోటీపడేందుకు నాణ్యమైన విద్య అవసరమని ఆయన అన్నారు.

గతంలో ప్రతి రెండు కిలోమీటర్లకు ప్రాథమిక పాఠశాల, ఐదు కిలోమీటర్లకు ఉన్నత పాఠశాల, ప్రతి మండలంలో జూనియర్ కాలేజ్ ఏర్పాటు చేయడంతో విద్య అందుబాటులోకి వచ్చిందని రేవంత్ రెడ్డి గుర్తు చేశారు. అయితే ఆ విద్యను నాణ్యతతో నింపడం అవసరమని స్పష్టం చేశారు. మాజీ ప్రధాని పివి నరసింహారావు నల్గొండ జిల్లాలో మొదట ప్రారంభించిన రెసిడెన్షియల్ స్కూల్ దేశానికి ఐఏఎస్, ఐపీఎస్ వంటి ఉన్నతాధికారులను అందించిందని ఆయన కొనియాడారు.

జపాన్, జర్మనీ, దక్షిణ కొరియా, ఫిన్లాండ్, చైనా వంటి దేశాలతో పోటీపడేలా తెలంగాణ విద్యార్థులను తీర్చిదిద్దడమే తమ లక్ష్యమని రేవంత్ రెడ్డి పేర్కొన్నారు. విద్యార్థులకు పౌష్టికాహారం కూడా అవసరమని, కేవలం ఆహారం సరిపోదని, డాక్టర్లు సూచించే న్యూట్రిషన్ ఫుడ్ ఇవ్వాలని అన్నారు.

ఈ నేపథ్యంలో, విద్యాశాఖకు సలహాదారుగా కేశవరావును నియమించినట్లు ప్రకటించారు. విద్యారంగంలో సమగ్ర మార్పులు తీసుకురావడానికి ఆయన సహకారం కోరారు. రాజకీయ నిర్ణయాలు తాను తీసుకుంటానని, విద్యా నిర్వహణకు కేశవరావు పూర్తి సమయం కేటాయించాలని రేవంత్ రెడ్డి విజ్ఞప్తి చేశారు.