భాష కేవలం కమ్యూనికేషన్ టూల్, నాలెడ్జ్ కాదు: సీఎం రేవంత్ రెడ్డి

తెలంగాణ ముఖ్యమంత్రి రేవంత్ రెడ్డి భాష అనేది కేవలం కమ్యూనికేషన్ సాధనమే తప్ప జ్ఞానం కాదని అన్నారు. ఆయన ఉపాధ్యాయ సంఘాల సమావేశంలో మాట్లాడుతూ ఈ వ్యాఖ్య చేశారు.

అమెరికాలో బిచ్చగాడు కూడా ఇంగ్లీష్ మాట్లాడతాడని, చైనాలో 10% మంది కూడా ఇంగ్లీష్ మాట్లాడరని ఆయన ఉదాహరణగా చెప్పారు. ఇంగ్లీష్ రాకపోయినా చైనా, జర్మనీ, సౌత్ కొరియా ప్రపంచాన్ని శాసిస్తున్నాయని గుర్తుచేశారు.

గత 25 ఏళ్లుగా భారత్ అమెరికా వైపు మాత్రమే చూసిందని, ఇకపై మనం జర్మనీ, జపాన్, సౌత్ కొరియా, సింగపూర్, చైనా దేశాలపై దృష్టి పెట్టాలని సీఎం సూచించారు. ఈ దేశాల భాషలు కొంచెం నేర్చుకుని సాంకేతిక నైపుణ్యం ఉంటే లక్షల రూపాయల జీతంతో ఉద్యోగాలు వస్తాయని ఆయన అన్నారు.

రాష్ట్రంలోని ప్రభుత్వ పాఠశాలల్లో 27 లక్షల మంది విద్యార్థులు ఉండగా, ప్రైవేట్ పాఠశాలల్లో 33 లక్షల మంది ఉన్నారని ఆయన గణాంకాలు ఇచ్చారు. విద్యను సంస్కరించి ప్రపంచస్థాయిలో నిలబెడతామని, ఇందుకు ఉపాధ్యాయ సంఘాలు పిల్లల సమస్యలపై పోరాడాలని కోరారు.

తమ సమస్యల బాధ్యత తాను తీసుకుంటానని, ప్రమోషన్లు, బదిలీలు, రిక్రూట్మెంట్ ఇంటి వద్దకే పంపిస్తానని ఉపాధ్యాయులకు హామీ ఇచ్చారు. ఇటీవల 55 రోజుల్లో 11,000 మంది టీచర్ల నియామకం పూర్తి చేశామని గుర్తుచేశారు. పీవీ నరసింహారావు, జయపాల్ రెడ్డి, బూరుగుల రామకృష్ణా రావు తెలంగాణ నుంచి దేశానికి నాయకత్వం అందించారని సీఎం కొనియాడారు.

రాబోయే ఐదేళ్లలో విద్యా వ్యవస్థను పూర్తిగా మార్చే ప్రణాళిక ఉందని, ఇందుకు టీచర్లు ప్రతిజ్ఞ చేయాలని ఆయన విజ్ఞప్తి చేశారు.