కొడంగల్‌లో సీఎం రేవంత్ రెడ్డి మూడు రోజుల పర్యటన.. రూ.9,053 కోట్ల పనులకు శంకుస్థాపన

తెలంగాణ ముఖ్యమంత్రి రేవంత్ రెడ్డి తన సొంత నియోజకవర్గం కొడంగల్‌లో మూడు రోజుల పర్యటన చేపట్టనున్నారు. పర్యటనలో భాగంగా రూ.9,053 కోట్ల అంచనా వ్యయంతో చేపట్టే 13 అభివృద్ధి పనులకు ఆయన శంకుస్థాపన చేస్తారు.

ఇప్పటికే నిర్మాణం పూర్తయిన 10 ప్రభుత్వ భవనాలను ఆయన ప్రారంభిస్తారు. ఈ భవనాల నిర్మాణానికి రూ.46.8 కోట్లు ఖర్చు చేసినట్టు సమాచారం. పాఠశాలలు, కళాశాలలు, ఆసుపత్రులు, పోలీస్ స్టేషన్లు, ప్రభుత్వ కార్యాలయ భవనాలు ఇందులో ఉన్నాయి.

ఈ నెల 7న ఉదయం 10:30 గంటలకు రేవంత్ రెడ్డి హైదరాబాద్ నుంచి హెలికాప్టర్‌లో బయలుదేరుతారు. ఉదయం 11 గంటలకు వికారాబాద్ జిల్లా దిద్దాల మండలం హకీంపేటకు చేరుకుంటారు. 11:10 గంటలకు మెగా రైతు మేళ, ఇండస్ట్రియల్ ఎక్స్‌పోను ప్రారంభిస్తారు. మధ్యాహ్నం 12 గంటల వరకు ప్రదర్శన స్టాళ్లను సందర్శిస్తారు. ఆదర్శ రైతులు, వ్యవసాయ శాస్త్రవేత్తలతో ముఖాముఖి నిర్వహిస్తారు. మధ్యాహ్నం 1 నుంచి 2 గంటల వరకు పారిశ్రామికవేత్తలతో సమావేశం ఉంటుంది. మధ్యాహ్నం 3 గంటలకు రోడ్డు మార్గంలో కొడంగల్‌కు చేరుకుని అక్కడే బస చేస్తారు.

ఈ నెల 8న ఉదయం 9:30 నుంచి 10:20 వరకు స్వయం సహాయక సంఘాల మహిళలతో సీఎం సమావేశమవుతారు. అనంతరం పలు అభివృద్ధి పనుల శిలాఫలకాలను ఆవిష్కరిస్తారు. పూర్తయిన భవనాలను, కొత్త పనులను ప్రారంభిస్తారు.

సాయంత్రం 4 గంటలకు కొడంగల్ నివాసం నుంచి హకీంపేటకు చేరుకుంటారు. అక్కడ నిర్వహించే భారీ రైతు బహిరంగ సభలో ప్రసంగిస్తారు. రంగారెడ్డి, వికారాబాద్, నారాయణపేట, సంగారెడ్డి, మెదక్, మహబూబ్‌నగర్, వనపర్తి, గద్వాల, నాగర్‌కర్నూల్, మెడ్చల్, మల్కాజిగిరి జిల్లాల నుంచి రైతులు హాజరవుతారు. సుమారు 50 వేల మంది రైతులు వచ్చేలా ఏర్పాట్లు చేస్తున్నట్టు అధికారులు తెలిపారు.