ఎస్ఐఆర్ ప్రక్రియలో నిర్లక్ష్యంపై సీఎం రేవంత్ రెడ్డి ఆగ్రహం; నేతలకు హెచ్చరిక

తెలంగాణలో ఓటర్ల జాబితా ప్రత్యేక సంక్షిప్త పునర్విచారణ (SIR) ప్రక్రియ వేగంగా కొనసాగుతోంది. ఇప్పటికే 80 శాతం ప్రక్రియ పూర్తయినట్లు అధికారులు తెలిపారు. ఈ నేపథ్యంలో కాంగ్రెస్ నేతల వ్యవహారశైలిపై సీఎం రేవంత్ రెడ్డి తీవ్ర అసంతృప్తి వ్యక్తం చేశారు.

సీఎం రేవంత్ రెడ్డి పార్టీ నేతలతో సమావేశమై SIR ప్రక్రియలో నిర్లక్ష్యం వహించారని ఆగ్రహం వ్యక్తం చేశారు. ఆగస్టు 3వ తేదీ వరకు మంత్రులు, ఎమ్మెల్యేలు, ఇంచార్జిలు ఎవరూ హైదరాబాద్‌కు రావద్దని, నియోజకవర్గాల్లోనే ఉండాలని ఆదేశించారు. ఈ ఆదేశాలు ఉల్లంఘించినా కొందరు నేతలు సచివాలయానికి రావడంపై సీఎం తీవ్ర అసహనం వ్యక్తం చేశారు.

రాబోయే వారం రోజుల పాటు క్షేత్రస్థాయిలో ఉండి ఓట్ల నమోదు పరిశీలన పూర్తి చేయాలని సీఎం హుకుం జారీ చేశారు. బీఎల్ఓ నివేదికలపై మాత్రమే ఆధారపడకుండా, కాంగ్రెస్ బూత్ లెవల్ ఏజెంట్లు స్వయంగా ఓటర్ల ఇళ్లకు వెళ్లి ఎన్యూమరేషన్ ఫారాలు నింపాలని ఆదేశించారు. నిర్లక్ష్యం చేస్తే ఎంతటి వారికైనా చర్యలు తీసుకుంటామని హెచ్చరించారు.

అంతేకాకుండా, SIR ప్రక్రియలో బాగా పనిచేసిన 100 మంది బూత్ లెవల్ ఏజెంట్లను ఢిల్లీకి తీసుకెళ్లి రాహుల్ గాంధీతో ప్రత్యేక సమావేశం, ఫోటో సెషన్ ఏర్పాటు చేస్తామని రేవంత్ రెడ్డి ప్రకటించారు. ప్రతిపక్ష పార్టీలు కాంగ్రెస్ సానుభూతి ఓట్లను తొలగించేందుకు కుట్ర చేస్తున్నాయని కూడా ఆయన ఆరోపించారు.