హైదరాబాద్ మెట్రో నిర్ణయాల అమలుపై సీఎం రేవంత్ రెడ్డి కేంద్ర మంత్రులకు లేఖ

తెలంగాణ సీఎం రేవంత్ రెడ్డి కేంద్ర మంత్రులు కిషన్ రెడ్డి, మనోహర్ లాల్ ఖట్టర్‌లకు లేఖలు రాశారు. హైదరాబాద్ మెట్రో రైల్ ప్రాజెక్టు విస్తరణకు సంబంధించి గత నెల 23, 24 తేదీల్లో ఢిల్లీలో జరిగిన సమావేశాల్లో తీసుకున్న నిర్ణయాలు అమలు కావడం లేదని లేఖల్లో పేర్కొన్నారు.

ఈ సమావేశాల్లో మెట్రో మొదటి దశను ఎల్ అండ్ టి నుంచి ప్రభుత్వం టేకోవర్ చేసుకోవడంపై అధ్యయనం చేసే బాధ్యతను ఎస్‌బిఐ క్యాప్స్‌కు అప్పగించాలని నిర్ణయించారు. అలాగే రెండో దశ అధ్యయనం కూడా అదే సంస్థకు ఇవ్వాలని, కేంద్ర, రాష్ట్ర ప్రభుత్వాల నుంచి ఒక్కో అధికారిని సమన్వయం కోసం నియమించాలని కూడా తీర్మానించారు. రాష్ట్ర ప్రభుత్వం ఎంఏయుడి ప్రత్యేక సిఎస్ జయేష్ రంజన్‌ను నియమించింది. కానీ కేంద్రం నుంచి ఇంకా అధికారిని నియమించలేదు.

ఎస్‌బిఐ క్యాప్స్‌కు బాధ్యతలు అప్పగిస్తూ కేంద్రం నుంచి ఉత్తర్వులు జారీ కాలేదని, అధ్యయనం చేయాల్సిన అంశాలు, షరతులు ఇంకా ఖరారు కాలేదని ముఖ్యమంత్రి లేఖలో పేర్కొన్నారు. ఈ విషయాల్లో వెంటనే చొరవ తీసుకోవాలని కోరారు.

మెట్రో టేకోవర్‌కు సంబంధించి రూ. 13 వేల కోట్ల రుణాల పునర్వ్యవస్థీకరణ, రెండో దశ అనుమతుల ప్రక్రియలో జాప్యం జరుగుతోంది. ఈ నేపథ్యంలో మెట్రో నిర్వహణ కష్టతరం అవుతుండటంతో కేంద్రం తక్షణమే స్పందించాలని ఆయన విజ్ఞప్తి చేశారు.