యాదగిరి గుట్ట ఆలయ అభివృద్ధిపై సీఎం రేవంత్ రెడ్డి సమీక్ష, కొత్త ట్రస్ట్ బోర్డు నియామకం

ముఖ్యమంత్రి రేవంత్ రెడ్డి యాదగిరి గుట్ట శ్రీ లక్ష్మీ నరసింహ స్వామి ఆలయ సమగ్ర అభివృద్ధిపై ఉన్నత స్థాయి సమీక్ష సమావేశం నిర్వహించారు. ఆలయ భూముల పరిరక్షణ, భక్తుల సౌకర్యార్థం చేపట్టాల్సిన నిర్మాణాలపై అధికారులకు పలు ఆదేశాలు జారీ చేశారు.

ఈ సమావేశంలో, ఆలయ భూముల కేటాయింపులపై తిరుమల తిరుపతి దేవస్థానం (టీటీడీ) అనుసరిస్తున్న నిబంధనలు, విధానాలను క్షుణ్ణంగా అధ్యయనం చేయాలని అధికారులను ఆదేశించారు. ఆ భూములపై పూర్తి యాజమాన్య హక్కులు ఆలయాలకే ఉండేలా చూడాలన్నారు. పబ్లిక్ ప్రైవేట్ భాగస్వామ్యం (పీపీపీ) విధానంలో ఒక ప్రత్యేక టూరిజం సర్క్యూట్ ఏర్పాటు చేయాలని సూచించారు.

కొండపై కాటేజీలు, గెస్ట్ హౌస్ల నిర్మాణం చేపట్టేందుకు ఆసక్తి ఉన్న దాతలు, సంస్థల జాబితాను తక్షణమే సిద్ధం చేయాలని, వారికి విడతలవారీగా నిర్మాణ అనుమతులు మంజూరు చేయాలని సీఎం స్పష్టం చేశారు. తిరుమల మోడల్‌ను ఈ నిర్మాణాల్లో అనుసరించాలన్నారు.

ఆలయ పునర్నిర్మాణ పనుల నాణ్యతపై నిపుణుల కమిటీ నివేదికను పరిశీలించి, దానిపై వారం రోజుల్లో సమగ్ర నివేదిక ఇవ్వాలని సీఎం ఆదేశించారు.

సమీక్ష అనంతరం, రాష్ట్ర ప్రభుత్వం యాదగిరి గుట్ట దేవస్థానం ధర్మకర్తల మండలిని ఏర్పాటు చేస్తూ ఉత్తర్వులు జారీ చేసింది. ట్రస్ట్ బోర్డు చైర్మన్‌గా ప్రముఖ ఫార్మా సంస్థ ఎం‌ఎస్‌ఎన్ సీఎం‌డీ మన్నె సత్యనారాయణ రెడ్డిని నియమించారు. బోర్డులో 10 మంది సభ్యులు, ఏడుగురు ఎక్స్ అఫీషియల్ సభ్యులు ఉంటారు. నటుడు చిరంజీవి తదితరులకు సభ్యత్వ అవకాశం కల్పించారు. సవరించిన చట్టం ప్రకారం ఈసారి ప్రభుత్వమే చైర్మన్‌ను నియమించింది. రాజకీయ జోక్యం తగ్గించి, విరాళాల సేకరణను ప్రోత్సహించేందుకు ఈ నియామకాలు జరిగాయని భావిస్తున్నారు.